Shillong, Lber:
Ka tnad pulit jong ka distrik ka la pyrkhing ïa ka ïaid ka ïeng jong ki kali kit mar heh ba kynthup ïa ki trok ban ïaid sha Mawphlang bad Sohra naduh ka 8 tarik haduh ka 10 tarik mynta u bnai.
“Kane ka long ka jingpyntip sha ki paidbah ba ka tamasa Monolith, 2024 kan sa long ha Mawphlang naduh ka 7 tarik haduh ka 9 tarik mynta u bnai katba ka ‘Annual General Meeting’ ba 22 jong ka KJP Synod Sepngi kan long ha ka 10 tarik mynta u bnai ha Laitryngew, Sohra,” la ong ka kyrwoh na u S.P. ka East Khasi Hills.
U la ong ruh ba namar jong kitei ki prokram haneng, la khmih lynti ïa bun tylli ki kali kiba na ka distrik bad kiwei ki distrik kumjuh ki ban wan ïashim bynta ha kitei ki prokram.
Kumta ka lah ban don ka jingthut ha ka leit ka wan namar ka jingjur jong ka jingïaid ki kali ha ki jaka bapher-bapher jong ka nongbah bad ka thaiñ Upper Shillong.
Shuh shuh u SP u la bynrap ba kan don ka jingpyrkhing ha ka ïaid ka ïeng jong baroh ki kali kit mar heh kumjuh ki trok sha Mawphlang bad Sohra ha ki 3 sngi lynter – 8, 9, bad 10 tarik mynta u bnai naduh ka por 6 baje mynstep haduh 11 baje mynmiet.
Hynrei, yn shah ïa ki kali na bynta ki kam ba kyrkieh, la ong ka kyrwoh na u SP.
