Shillong, Lber 06
Hapdeng kiba bun ki jingshah kynthoh bad ki jingïaroh, ka sorkar Meghalaya Democratic Alliance (MDA) ka la ïeng kum ka sorkar synroplang ban shakri ïa u paidbah la 6 snem kynthih naduh ba la thaw ïa ka hapoh ka jingïalam jong ka National People’s Party (NPP).
Ïa ka sorkar MDA la thaw nyngkong eh ha u snem 2018. Kane ka sorkar ka la shakri ïa u paidbah la 5 snem kynthih bad ha ka ilekshon kaba la long mynshem snem (2023), ka sorkar MDA sa shisien ka la ïoh ban thaw sorkar biang ïa kaba la ai kyrteng ka MDA 2.0. Kumta ha ka 6 tarik u Lber 2024, ka MDA 2.0 ka la dap 1 snem pura ban ai jingshakri ïa u paidbah hadien ba la pynbam smai ïa ka ha ka 6 tarik u Lber, 2023.
Ha kane ka sorkar MDA 2.0 la ïasynroplang da ki seng riewlum bad ki seng saiñ pyrthei kiba heh ba la lamkhmat da ka National People’s Party (NPP) ha ka jingïasynroplang bad ka United Democratic Party (UDP), ka Hill State People’s Democratic Party (HSPDP), ka Bharatiya Janata Party (BJP) bad ki kyrtong shimet.
Halor kane ka bynta, na ka liang U Nongsaiñ Hima haba ïoh ban ïakren bad u President ka Hynñiewtrep Integrated Territorial Organisation (HITO), u Bah Donbok Dkhar, u la ïaroh bad u la ruh kynthoh ruh ha kajuh ka por ïa katei ka sorkar.
U Bah Donbok u la ïaroh ïa ka sorkar MDA halor ka jingpynjlan ïa ka rta thung kam-thung jam jong ki khynnah samla na ka 32 sha ka 37 snem, ka jingpyndam noh ïa ka Meghalaya Regulation of Gaming Act, 2021 kaba ka la mynjur ha utei ujuh u snem, ka jingkyntiew ïa ki kam kilan met hapoh ka jylla nalor kiwei-kiwei de.
“Dang shen ha ka por ba don ka Meghalaya Games ki la ong ba ki lut `30 klur bad na ka liang jong ngi, ngi la sngewphylla ba kumno kan poi haduh `30 klur tam kata ka jingpynlut jong ka sorkar MDA hynrei ynda la wad RTI, ngi la lap ba katkum ki kot bad ki sakhi kiba biang, kato ka `30 klur ka dei ba ki pynbha ïa ki skul bad ki paiñkhana na ka bynta ban sah ki khynnah ïalehkai shapoh Tura bad kiwei-kiwei ki jingthied bad ki jingpynbha kiba bun”, la ong u Bah Donbok.
Katba ki jingkynthoh pat kiba u Bah Donbok u la ïohi ha kane sorkar MDA ki long ba ka khlem shimkhia ha kaba ïadei bad ka jingdawa ban pyntreikam ïa ka Inner Line Permit(ILP), ka Mining Policy bad ka jingpynrung ïa ka ktien Khasi hapoh ka khyrnit baphra jong ka riti synshar ka ri ha kaba ki nongïalam napoh ka sorkar pdeng kim burom shuh ïa ka jingmynjur lang jong baroh 60 ngut ki MLA napoh ka ïingdorbar thawaiñ ka jylla, ka jingbym nud jong ka sorkar MDA ban kren eiei halor ka Instrument of Accession (IOA), ka jinghiar ka pule ka puthi hapoh ka jylla namar ka jingbym lah ka sorkar ban pynbiang ïa ki jingdonkam jong ki skul, ka jingdkoh treikam ki jaka sumar ha kaba ki paidbah ki hap ban phah leit sumar shabar na ka bynta ki jingshitom kiba kham eh, ka jingpynlut ksan ïa ka pisa u paidbah nalor ba ka la dei lypa ka jylla kaba duk bad kaba don shibun ka ram nalor kiwei-kiwei de.
“Ka la long kaba i lehraiñ shisha ïa kine ki 60 ngut ki MLA bad wat ïa ka MDA ruh kumjuh namar ka dei ma ka kaba lamkhmat ban mynjur halor ka jingpyntreikam ïa ka ILP, ka jingkynthup ïa ka ktien Khasi hapoh ka khyrnit baphra jong ka riti synshar ka Ri bad ka Mining Policy, lehse ka dei ka jingïoh ïa u Myntri Rangbah u bym ler lane ba ki don tang uwei u MP ban kren halor kane ka kam”, la ong u Bah Donbok. U Bah Donbok u la ong ba wat la ka sorkar MDA ka long kaba kloi ban pyndem bad sngap hynrei lada phim sngap bad lada leh pyrshah ïa ka, kane ka sorkar ka pyntieng-pynsmiej bad ka bom ka tied beit naphang. Ka seng HITO ka dei kawei na ki sengbhalang kaba la mad ïa kane ka jingshah leh tohmet ha ki bor ka aiñ jong ka sorkar jylla haba ka ïeng ban pyrshah ïa ki mat ki jura jong ka Jaitbynriew bad haba ka seng kam kohnguh bad ka ïaleh pyrshah ïa ka sorkar.
“Kaei kaba ngi dei ban kynthoh, ngin hap kynthoh ïa ki jingshisha. Ha kawei ka liang, ngim lah ban len ba kane ka sorkar ka long kaba kloi hynrei lada phim sngap ïa kane ka sorkar, ka pyntieng-pynsmiej bad ka bom ka tied beit ïaphi”, la ong u Bah Donbok.
U Bah Donbok u la ong ruh ba kane ka sorkar lada kam lah ban pynkohnguh, ka ïaleh ban shim da kiwei ki lad ki lynti ban pynkohnguh.
Haba kylli la hato u dang kwah ban ïohi ba kane ka sorkar MDA kan wan biang ha ka bor synshar kum ka sorkar ha kawei oat ka samoi treikam, na ka liang u Bah Donbok u la ong ba lada ki paidbah kin hap ban mih sha surok sha syngkien ban dawa ïa ka hok, kan myntoi aïu ban thep vote bad pynjop ïa kum kitei ki kyrtong. Namarkata, kum ki paidbah ki dei ban jied da u nongmihkhmat u ban ïaleh ban kyntiew ïa kaba bha ka miat bad ka roi ka par na ka bynta u paidbah babun balang.
