Shillong, Lber 06
Namar ka jingdon jong katto-katne ngut ki briew kiba la shim kabu bad ka jingleh buittuh ïa ka umphniang pynmih shñiuh kaba la tip kyrteng kum ka Marvelous Oil kaba dei trai da ka Kong Reality Syiem kaba shong ba sah Marbaniang Umseiñïong hajan ka shnong Sadew, ka la pynlong ba kan dap da ka jingsngewsih bad ka jingsngewbynñiaw halor kane ka jingleh jong kitei ki briew.
Ka umphniang pynmih shñiuh jong ka Kong Reality Syiem ka dei kaba la pawnam bha ha kaba ka la pynlong ïa ki briew na kylleng ki jaka ba kin wan ban thied ïa katei ka umphniang pynmih shñiuh. Pynban ki don pat katto-katne ki ‘riewshim kabu kiba la khleh dawai ïa katei umphniang pynmih shñiuh jong ka Kong Reality bad ki don ruh pat kiba la die da kiwei ki umphniang hynrei ki la ong pat ba ka dei ka umphniang kaba la pynmih da ka Kong Reality bad kane ka la ïalam bakla ïa u paidbah.
Haba kren sha ki lad pathai khubor ha ka Sngi Balang ha Shillong Press Club, ka Kong Reality ka la ong ba ki paidbah kim dei ban thied kulmar ïa katei ka umphniang lait noh na ka bad na ka dukan jong ka kaba don ha Motphran.
Ka la ong ba ki paidbah kim dei ban thied ïa katei ka umphniang palat ïa ka `500 namar ka dor ba shisha jong katei ka umphniang ka dei `400 bad `200.
Ka Kong Reality ka la ïathuh ruh ba ka jingsdang ban shna ïa katei ka umphniang pynmih shñiuh ka dei namar ba kam don shñiuh ïalade, bad kumta da ka jingai jingstad U Blei ka la pynlong ïa ka ba kan shna dawai hi ban pynmih shñiuh ha kaba ka la shimpor 2 snem eiei.
“Na kane ka umphniang, ki briew ki ïoh khiah ruh na ki jingpang, kam dei tang na ka bynta u shniuh hynrei lada pang ka met ka phad ruh ka ai jingkhiah”, la ong ka Kong Reality. Shuh shuh ka Kong Reality ka la ïathuh ba haduh mynta kiba la wan shim dawai pynmih shñiuh na ka ki don kumba 10,000 eiei. Kitei kiba la wan shim dawai na ka kim dei satia tang napoh ka Rilum Khasi bad Jaiñtia hynrei wat na bar jylla ruh ki don. Nangta, ka la ong ba jan baroh kiba la wan shim dawai na ka, ki mih shñiuh lut kata na ka 100% tang 5% ki dei ki bym mih shñiuh shuh namar ba ki khlem bud katkum ka jingbthah jong ka.
