Nongstoiñ, Lber:
Ka Hynñiewtrep Youths Council (HYC) West Khasi Hills District bad ka Mawshynrut Youths Movement (MYM) ha ka Lah Sngi U Blei ki la leit ban tuklar ïa ka ‘interview’ thung kam bad na ka liang u DC u la hap ban pynsangeh noh shwa.
Ka HYC hapoh ka jingïalam u samla Lumlang Kharsyiemlieh bad ka MYM hapoh ka jingïalam u samla Shembor Rynniaw hadien ba ki la ïoh jingtip ba ka shlem treikam jong ka tnat Social Welfare ha West Khasi Hills District kan pynbeit ‘Interview Direct’ da kaba shim na ki samla ba la pynrung kyrteng ha ka ophis Employment Exchange, ïa ki post Gender Specialist, Specialist in Financially, MTS, DEO, Accountant bad kiwei, ki la leit sha katei ka shlem treikam da ka jingthmu ban pynsangeh.
Haba kren sha ki lad pathai khubor, ki nongïalam jong ka HYC bad MYM ki la ong, hadien ba la ïoh jingtip ba ka shlem treikam Social Welfare na West Khasi Hills District kan pynbeit Interview, ki la pynsngew sha ka ophisar ba dei peit ba dei ban pynsangeh hynrei la ong ba ym shym la pdiang ha kaba, ka la ong ba yn ïaid beit shakhmat namar la ïoh ïa ka hukum na ki bor ba dei peit.
Shuh shuh, ki la ong ruh ïa u DC ka West Khasi Hills ban pynsangeh noh ïa kane ban ïaid shuwa da ka jingpynbna (Advertisement) ban leh kumba ju leh ka rukom thungkam.
Ki la ong ruh ba ki la ïohi ïa ka jingshimkhia u DC ba la pynsangeh (Postponed) ïa katei ka jingkhot Interview.
U samla Lumlang u la ong, ka seng kam kwah ba ki ophisar kin shim ïa ka bor khlem da pyrkhat ïa ka rukom thungkam bad ka sngewnguh ïa u DC uba la sngap ïa ka jingkyrpad jong ar seng na ka bynta ka lawei ki samla wad kam.
U Bah Shem Rynniaw u la ong, kum ka kynhun halor kane bynta ka pyrshah jur bad kim lah ban mynjur bad ka pynpaw ïa ka jingpyrshah jur ïa ka jingleh jong ka tnat, namar ka jingduhnong ka long ïa ki samla kiba wad kam hynrei kim ïoh jingtip ne advertisement katkum ka hok jong ki ban tip.
U la ong ruh ba ka seng ka maham ïa ki tnat treikam bapher bapher ba nangne shakhmat lada don ki kam kiba lait, ki dei ban pyllait da ka byrta khnang ba ka rukom thungkam thungjam kan long kaba ïaid beit ïaid ryntih bad ban bud ïa ki kyndon jong ka rukom thung kam.
