Nongstoiñ, Lber 06
Ki lama ïong jong ki nongñiah kali Tourist Nongstoiñ kiba don hapoh ka shatri jong ka Joint Action Committee Nongstoiñ Tourist Association, ki la ïeng ha ka Sngi Balang ha ki bynta ka sor Nongstoiñ ban pynpaw ïa ka jingsngewsih bad pynrem jur ïa ka jingshah pynïap dusmon u para nongñiah kali u samla Mackbornbonnyson Kharbani kaba la jia ha ka miet shiteng synñia jong ka 3 tarik u Lber ha Taxi Stand Kynroh kaba ha sor Nongstoiñ.
Ha kane ka jingdeng ïa ki lama ïong la ïohi ba la shim bynta da kiba bun ki kali kamai kiba hap hapoh ka shatri jong ka JAC bad kiwei kiba don ka mynsiem sngewkhia ïa ka jingshah thombor bad shah pynïap u samla ha ki ‘riew thrang snam.
Kumba ka JAC Nongstoiñ Tourist Association ka la dep ban pynbna ba ka jingdeng lama ïong kan neh ar sngi lynter bad kan bteng ruh ha ka 7 tarik jong ujuh bnai.
Ka jingdeng lama ïong ka long kum ka dak ban pynpaw ïa ka jingsngewsih halor ka jingduh noh ïa uwei na ki para nongñiah kali uba la shah pynïap ha ki ‘riew thrang snam bad ka pynrem jur ruh ïa ki runar kiba donkti ban leh ïa katei ka kam, la ong uwei na ki dkhot ka JAC.
