Shillong, Lber 06
U Myntri ka tnad Social Welfare, Bah Paul Lyngdoh, ha ka Sngi Balang u la ong ba ka tnad ka ïakynduh jingeh shi kat dei ban pynïeng ïa ki ‘Rehabilitation Centre’ ha ki shnong ki thaw. Haba kyntu ïa ki Dorbar Shnong bapher-bapher ban wan shakhmat bad ïarap ïa ka tnad ban pynïoh jaka na bynta ban pynbun ïa kiba kum kitei ki jaka sumar, u Myntri u la pynsngew ba ka don ka jingñiewbeiñ ba ki kheiñ ba kam bit ne ka i long lehraiñ ïa kato ka shnong ban don ïa ka ‘Rehabilitation Centre’ ha kata ka shnong.
“Kata ka dei kawei ka mawjynthut kaba ngi ïakynduh, hynrei nga kyrpad ïa ki Dorbar Shnong ba kin sngewthuh ba kane ka dei ka jingeh kaba ym dei tang kawei lane 5 tylli ki shnong ki ïakynduh, hynrei baroh ha sor bad nongkyndong ki ïakynduh ïa ka jingeh jong ka jingkyrni ha ka jingdih drok,” u la ong.
Ha kajuh ka por, u la ban jur halor ka jingdonkam ïa ki shnong ban wan shakhmat bad kyrshan ïa ka tnad khnang ban kner jingïarap sha kito ki samla kiba la ngop ha ka jingkyrni dih drok. Na ka liang u Myntri u la ïathuh ba ka tnad ka la lah ban kyrshan 6 tylli ki ‘Rehabilitation Centre’ kiba la pynïeng da ka Sorkar kumjuh ïa ki nongrim kiba long trai da ki briew shimet – kiba ïoh pat ïa ka jingkyrshan pisa na ka tnad.
Shuh shuh u la bynrap ba ka sienjam kaba khatduh kaba dang sdang shen ka dei ka Centre na bynta ka shnong Mawlai ha ka jingïatreilang bad ka Mawlai Town Dorbar kaba la ai ruh ïa ka khyndew na bynta ban sdang ïa katei ka jaka.
Haba jubab, u la ong, “Ki don ki kyndon kiba hap ban pyndep…kaba kongsan ka long ba ngin peit ïa ki jaka kiba i donkam shisha…ki don ki jaka kiba ngi ju khot ki ‘Hot Spot’ bad kine ki don hajan baroh ki distrik lait noh ha katto-katne.”
