Shillong, Lber 06
Ka tnat District Council Affairs (DCA) ka Sorkar Jylla lem bad ki Autonomous District Council (ADC) ka la ïatai haba ïadei bad ka aiñ shna ïing nalor ka aiñ ban pynrung kyrteng ïa ki jaka puta kaba tip kum ka Indian Registration Act ha kaba la rai ban thaw da ki Committee ban khmih biang ïa kine ki aiñ khamtam lada donkam ban wan kino-kino ki jingpynkylla.
Ïa ka jingïakynduh hapdeng ka tnat DCA bad ki ADC la pynlong ha Secretariat ha kaba u Symbud Myntri Rangbah uba peit ïa ka tnat DCA, u Bah Prestone Tynsong u la pynïaid ïa ka jingïalang ha kaba la donlang ruh ki ophisar na ka tnat pynroi sor, nalor ka tnat Revenue bad kiwei kiwei.
Ynda la wai ka jingïakynduh, u Bah Prestone u la ïathuh sha ki lad pathai khubor ba ka Sorkar Jylla ha ki khyndiat snem ba la leit, ka la dep pynmih ïa ka jingpynbna ban pyntreikam ïa ka aiñ shna ïing da ka Meghalaya Urban Development Authority (MUDA) bad ki ADC.
Ki ADC ki kwah ban pyntreikam lang ïa ka building byelaws ha baroh ki jaka ka Khyrnit Hynriew khlem da kheiñ la ki dei ki jaka sor ne jaka nongkyndong.
U la ong ba ki ADC kin pyntreikam ïa ka Building Byelaws shabar na ki jaka ka Municipal. Hynrei, katto katne ki jaka kum ki Industrial Estate, ki Hotel bad ki jingtei kiba heh kin dei kiba hap hapoh ka jingkhmih ka MUDA.
Kumta u Bah Prestone u la ong ba lyngba ka jingïakren, la lap ba ki dang don katto-katne ki kam kiba donkam ïa ka Sorkar ban khmih biang ïa ka building byelaws.
U Bah Prestone u la ong ba hadien ba la ïatai sani lang, la rai ban thaw ïa ka Committee ka ban khlieh da u Secretary ka tnat Urban Affairs, ban ïakren halor ka building byelaws kaba don mynta bad ban peit la ka dang donkam ne em ban wanrah ka jingpynkylla ïa ka aiñ. Kumta la ieh ha ka Committee ban pynmih ïa ka jingpynbna.
U la ong ba ki dkhot jong kane ka Committee kin long ruh na baroh lai tylli ki District Council nalor ki ophisar ka tnat Urban Affairs, ka Revenue bad kiwei kiwei ki tnat kiba don bynta lang.
