Kolkata, Lber 05 (UNI)
U Abhijit Gangopadhyay u la iehnoh ïa ka kam kum u Nongbishar (Justice) ka Calcutta High Court ha ka Sngi Ba-Ar, bad ha kane kajuh hi ka sngi, u la pynbna ba u don jingthmu ban pynïasoh sha ka seng saiñpyrthei, kata, ka Bharatiya Janata Party (BJP).
Haba kren sha ki lad pathai khubor ha ïing sah jong u, utei u Nongbishar barim, uba la pynmih ïa kiba bun ki rai bad hukum kiba paw, khamtam ha kaba ïadei bad ka jingbym ïaid ha ka jingthung kam nonghikai ha West Bengal, u la ong ba un pynïasoh bad ka BJP namar dei tang ka BJP kaba ïakhun ïa kita ki jingshah kynnoh bamsap ka sorkar TMC ha Bengal.
U Gangopadhyay u la ong ba u lah ban pynïasoh bad ka BJP ha ka 7 tarik Lber.
U la ïathuh ba u la dep ban phah ïa ka shithi iehnoh kam kum u Nongbishar sha ka President ka Ri, ka Droupadi Murmu, bad kumjuh ruh sha u Chief Justice ka Ri India, u DY Chandrachud, bad u Chief Justice ka Calcutta High Court, u TS Sivagnanam.
Ka jingiehnoh kam jong u Gangopadhyay ka la wan kumba san bnai ha shwa ba u dei ban shongthait noh kum u Nongbishar ka High Court.
Haba jubab ïa ka jingkylli la dei ma u uba la leit ban ïakren bad ka BJP, utei u Nongbishar barim u la ong, “Ka jingïakren ka long na baroh arliang. Ma nga ruh nga la leit sha ka BJP, bad ka BJP ruh ka la wan sha nga.” U la bynrap ba ha ki hynñiew sngi ba la leit noh, u khlem leh ïa kano-kano ka kam kaba ïadei bad ka jingbishar ïa ki mukotduma bad ka BJP bad ma u ki la sdang ban ïakren hapoh kitei hynñiew sngi.
