Shillong, Lber 06
Ka tnad pulit ha ka Sngi Balang ka la pynmih ïa ka byrta ha kaba ïadei bad ka jingpynrung sha ki 2,968 tylli ki kam kiba lait.
Ïa kane ka byrta la pyllait na ka shlem treikam jong u Inspector General of Police (R/PR) uba long ruh u Chairman ka Central Recruitment Board.
Ha kane ka byrta, la kren shai ba ki nongshong shnong kiba thep ïa ki kam kiba lait ki lah ban leh ïa kane tang lyngba ka rynsan ‘Online’ bad yn ym pdiang satia ïa ki kot thep kam da kiwei pat ki lynti.
Ïa ki kot ki sla ban thep kam yn hap ban pyndap bad thep lyngba ka ‘Online’ naduh ka 1 tarik Ïaïong, 2024 bad ka tarik kaba khatduh ban pdiang ïa ki kot ki sla kan dei ha ka 30 tarik Ïaïong, 2024.
Ïa ki kot ki sla hap ban ai lyngba ka ‘website’ (https://megpolice.gov.in) jong ka tnad pulit bad ka dor kan long `150 na ka bynta kawei ka kam lane ka ‘post’.
Katkum ka byrta, ki don 2,968 tylli ki kam ha ki kyrdan bapher-bapher. Kine ki kynthup ïa 76 tylli na ka bynta ki Sub-Inspector (Unarmed Branch), 720 tylli ïa ki Constable (Unarmed Branch), 195 tylli ki Fireman, 53 tylli ki Driver Fireman, 26 tylli ki Fireman Mechanic/Mechanic, 205 tylli ki MPRO Operator, 56 tylli ki Signal/BN Operator.
Nalorkata, ki don 1,494 tylli ki kam kiba lait na ka bynta ki Armed Branch Constable/Battalion Constable/MPRO GD/Constable Handyman. Ki don ruh sa 143 tylli ki kam na ka bynta ki Driver Constable.
Haba la kheiñ kyllum, ki kam baroh kiba lait ki long 2,968 tylli bad na kine la bhah 445 tylli na ka bynta ki samla kiba dei na ka Unreserved Category, 1,187 na ka bynta ki Khasi Jaiñtia, 1,188 tylli na ka bynta ki Garo bad 148 na ka bynta Scheduled Caste bad Other Scheduled Tribes (OST). Ka tnat ka la ong ba kane ka jingai bhah ka long katkum ka ‘Reservation Policy’ jong ka jylla.
Shuh shuh ka tnat pulit ka la pyntip ba 10 na ka 100 lane 10 per cent na kitei ki kam yn bhah ïa ki kynthei lait noh sa tang ki kam kiba dei beit thik tang na ka bynta ki shynrang.
Ha kaba ïadei bad ka rta, la ong ba ki samla kynthei bad shynrang kiba thep ïa ka kam Unarmed Branch Sub Inspector ki dei ban long hapdeng 21 haduh 27 snem rta bad kiba la pyndep ym duna ïa ka Bachelors Degree na kano-kano ka ‘Stream’ bad na kano-kano ka skulbah ba la ithuh.
Na ka bynta ki Unarmed Branch Constable/Fireman/Driver Fireman/MPRO Operator/Signal Operator/Fireman Mechanic/Mechanic, ki samla thep kam ki dei ban long hapdeng 18 haduh 21 snem ka rta bad kiba la pyndep ym duna ïa ka Class 12.
Na ka bynta ka kam Armed Branch Constable/Battalion Constable/Driver Constable/Handyman Constable kiba thep kam ki dei ban long hapdeng 18 haduh 21 snem ka rta bad kiba la pyndep ym duna ïa ka Class 9.
Kitei ki rta ba la kdew haneng ki dei ban long katkum ka 1 tarik Kyllalyngkot, 2024. Hynrei ïa ka rta thep kam na ka bynta ki Scheduled Tribe, Other Scheduled Tribes (OST) bad Scheduled Caste, la pynjlan da san snem.
Kane ka mut ba na ka bynta ka kam Unarmed Branch Sub-Inspector kiba lah ban thep kam ki dei kiba haduh ka 32 snem ka rta, katkum ka tarik ba la kdew haneng, bad lada ki long ki Scheduled Tribe, Other Scheduled Tribes (OST) bad Scheduled Caste.
Na ka bynta ki kam Unarmed Branch Constable/Fireman/Driver Fireman/MPRO Operator/Signal Operator/Fireman Mechanic/Mechanic bad Armed Branch Constable/Battalion Constable/Driver Constable/Handyman Constable, kiba thep kam ki lah ban dei kiba la don haduh 26 snem ka rta, katkum ka tarik ba la kdew haneng, bad lada ki dei ki Scheduled Tribe, Other Scheduled Tribes (OST) bad Scheduled Caste.
Na ka bynta ki jingtip kiba kham bniah ha kaba ïadei bad kane ka byrta, kiba don jingthmu ban thep kam ki lah ban leit na ka ‘Website’ jong ka tnad pulit kaba dei www.megpolice.gov.in.
