Shillong, Lber:
Ka Karbi (Mikir) Traditional Faith (Religion) Association (KTFA) ka la pynshai ba ka jingkynnoh halor ka jingphah weng ïa ki mot dur na ïingskul kam long kaba shisha bad kyrpad ïa baroh ki nongshong shnong ka Jylla ban ym sngewthuh bakla halor ki khubor kiba lah ban ïalam bakla.
“Hadien ba ngi la ïohsngew ïa ka jingkren u MLA ka Nongpoh konstitwensi ha ïingdorbar thawaiñ ha ka 27 tarik u bnai ba la dep haba ïadei bad ka jingshong syier ki paidbah ha ka thaiñ Marmaiñ, na ka liang ki nongshong shnong bad ki nongïalam ka KTFA-Meghalaya hadien ba ngi la ïohsngew na ki rynsan lad pathai, ngi pyrshang ban wad jingtip hapoh ka shnong bad ha ki jaka ba marjan, ngim shym la lap sabut eiei ruh em kaba kum kata ka jingtah ‘poster’ hapoh shnong ne hangno-hangno ruh,” la ong ki nongïalam ka KTFA ha ka kyrwoh khubor.
Kumta ka seng ka pynshai ba katei ka khubor ka long kaba ïalam bakla bad kyrpad ïa baroh ki nongshong shnong ka Jylla ban ym sngewthuh bakla.
“Haba ïadei bad ka ‘voice mail’ kaba ngi ïohsngew baroh, ngi na ka liang ki nongïalam ka KTFA, ngi la pyrshang ban wad jingtip bad ngim shym la ïoh kano-kano ka sabut ba don kum kita kumba kren ha ka ‘voice mail’,” ki la ong.
Ha kajuh ka por, halor ka jingkynnoh shim rai ban phah weng ïa ki mot dur na ïingskul, ka seng ka la kren shai ba kane kam long kaba shisha bad ym shym la don satia kaba kum kata ka rai.
“Ka jingïalang ha katei ka sngi ka long tang ka jingïasyllok haba shit ba shai hakhmat ki paidbah-paidlang baroh kumno ban pynneh-pynsah ïa ka jingngeit niam tynrai sha kine ki thaiñ,” la ong ka seng.
Kumjuh, halor ka jingkynnoh ba ka seng ka don ka jingïadei bad ka Sanmilato Samatan Samaj na Assam, ki nongïalam ka KTFA ki la pynshai ba kim don jingtip ne jingïadei eiei shaphang kata ka seng shit niam Hindu bad ka dang shu ïohsngew lyngba ka ‘voice mail’.
Shuh shuh ka seng ka la bynrap, “Haba ïadei bad ka ‘Traditional Symbol’, kum ka seng ngim don kano-kano ka jingtuklar ne hukum ban weng, hynrei ka shong ha ka bor jong u Syiem Hima Dumura (Doomora), kum u Syiem u Kmie ban pynbeit ïa kane ka kam.”
Kumta ka seng ka kyrpad ïa ki bor pynïaid distrik ba lada don kiba kum kita kiba pyndik, ki bor distrik ki dei ban leh ïa kaba donkam bad kum ka seng, ka kular ban ïatreilang bad ki bor distrik ban ym ai lad ïa kum kita kiba wan ban tuklar bad pynkulmar ha shnong ha thaw.
