Shillong, Lber 06
Ka tnat Personnel and Training (DOPT) jong ka Sorkar India ha ka jingïatreilang bad ka tnat kam ïalehkai, ka la wanrah ïa ki jingpynkylla ha ka jingpynrung kam, jingkyntiew, bad ki rukom ai jingmyntoi na ka bynta ki nongïalehkai.
Ki kyndon ba thymmai, ba la wanrah ha ka dorkhas ba la pyllait ha ka 4 tarik Lber, ki thmu ban kyntiew ïa ki jingmyntoi ba kham biang, ka jinglong shai, bad ka jingkynthup lang ïa baroh.U Myntri ka Sorkar Pdeng ba dei khmih ïa ka tnat ki kam ïalehkai, u Anurag Singh Thakur u la pynbna ba ki nongïalehkai kiba khur takma ha ka Khelo India mynta ki lah ban ïoh kam sorkar. U la ong “Ha ka jingpynurlong ïa ka thong jong u Myntri Rangbahduh jong ngi, u Narendra Modi ïa ka kam ïalehkai kaba khlañ, ka jingkyntiew ïa ki samla donsap naduh ki jaka nongkyndong bad ban pynkylla ïa ka kam ïalehkai sha ka lad kaba ïoh jingmyntoi, ki nongïalehkai ha ka lympung Khelo India mynta ki lah ban ïoh kam sorkar.”
U la bynrap ruh da kaba ong, “Nga sngewkmen ban pynbna ba ka tnat Personnel and Training (DoPT), ha ka jingïamir jingmut bad ka India Sports, ka la pynthymmai ïa ki bynta kiba ïadei ba ki jingai jingmyntoi ïa ki nongïalehkai kiba kwah kam Sorkar.”
Shuh shuh, ïa ki lympung ïalehkai bad ki prokram la kdew shai ban pynthikna ka jingkynthup ïa baroh ha ki jingïalehkai bapher bapher. U la bynrap ba kine ki aiñ ba la pynthymmai ki long ka sienjam ba kongsan ha ka jingkyrshan ïa ki nongïalehkai ban pynlong ïa ka India kaba khlaiñ ha ki kam ïalehkai.
Hapoh ki kyndon ba la pynthymmai, ki briew kiba tbit ha ki lympung ïalehkai kum ka Khelo India Youth Games (na ka bynta ki nongïashim bynta kiba 18 snem shaneng), ka Khelo India Winter Games, Khelo India Para Games, bad ka Khelo India University Games mynta kin ïoh kam sorkar. Shuh shuh, ki nongjop ha ka School Games Federation of India ruh kin don ka lad ban ïoh ïa kine ki kyrdan. Ka jingkynthup ha ki kyndon ba la pynthymmai ka dei ka jingsdang jong ka kyndon kaba shai na ka bynta ki jingïalehkai chess ha ka ri bad shabar ri, da ka jingpynthikna ïa kijuh ki lad ïa ki nongïalehkai chess.
Shuh shuh, ki briew kiba la mihkhmat ïa ka ri lane ka jylla ha ki lympung ïalehkai shabar ri lane ha ka ri, lane kiba la jop ha ki lympung junior ha ka ri, ki don ka lad ïoh kam. Ka jingbuh kyrdan kaba ryntih katkum ki jingjop ha ki kam ïalehkai ka dei ka ban bud khnang ban sngewthuh ïano ban jied shuwa.
Ban pynïaid beit ïaid ryntih ïa ka kam na ka bynta ki nongïalehkai ban ïoh ïa ki jingmyntoi, la pynthymmai ïa ka thup jong ki bor ba dei peit ïa ka jingai syrnod ban pynshisha ïa ka jingïoh lad ki nongïalehkai ban ïoh kam. Mynta, ki Secretary jong ki synjuk ïalehkai jong ka ri (na ka bynta ki lympung ïalehkai shabar ri), ki Secretary jong ki State Association (na ka bynta ki lympung ïalehkai hapoh ri), bad ki Dean lane ki Sports Officer jong ki skulbah (na ka bynta ki inter-University tournament), bad kiwei kiwei, ki don ka bor ban ai ïa kum ki syrnod. Ha ka sienjam ba kongsan, la ithuh ïa ka Khelo India Games kum ka lympung ïalehkai ba kongsan jong ka ri, da kaba ïasoh bad ki kyrdan jong kiwei kiwei ki jingïalehkai bad ki jingïakhun.
