New Delhi, Lber:
Ka ilekshon Lok Sabha 2024 ka la jan artad ha kaba man ki seng saiñ pyrthei ki la ïaleh katba lah ban khring ïa ki nongthep vote da kiba bun rukom. Kumba la ïathuh ka tyllong khubor, la ong ba ka seng Congress ka la thmu bad kular ban bud ïa ki bynta ban pynbiang ïa ka hok jong ki paidbah bad kawei na kine ka long na ka bynta ka “right to employment” ne ka hok ban trei ha ka mat treikam na ka bynta ka jingïakhun ïa ka Lok Sabha Elections 2024.
Ka tyllong khubor ka la ïathuh shuh shuh ba ka seng kan sa pdiang bad pyntreikam ïa ki aiñ na ka bynta ban pynshitom ïa ki briew kiba la donkti ha ka ban pyllait tuh ïa ki jingkylli eksam. U nongïalam jong ka seng Congress u Rahul Gandhi ha ka Lah Sngi U Blei u la kynthoh jur ïa ka sorkar jong u Narendra Modi namar ba um shym la lah pynurlong ban pyndap ïa ki jaka bathylli jong ki Post bad ong ba ka kynhun synrop INDIA kan sa plie ka jingkhang ba la khang jong ki lad ïohkam-ïohjam na ka bynta ki samla.
U Gandhi u la kynnoh ba ka jingthmu jong u Myntri Rangbahduh kam dei na ka bynta ban pynbiang kam pynbiang jam. Ha ka jingphah khubor ha ka rynsan phah khubor ha ka X, u la ong, “Ki samla jong ka ri, ki la pynkynmaw kawei ka bynta! Ka jingthmu jong u Narendra Modi ka long ban ym pynbiang kam pynbiang jam. Nalor ka jingphah ïa kiba bun ki khubor , la ong ruh ba u la shong ha ka shuki kaba thylli jong ka sorkar kmie.”
“Lada ngi khmih bniah ha kaba ïadei bad ka jingbuh jingkheiñ jong ka sorkar kmie ha Parliament, la ong ba ki la don kumba 9,64,000 tylli ki Post kiba sah thylli ha ki 78 tylli ki tnat treikam jong ka sorkar. Haba ngi khmih bniah ïa tnat ba kongsah, la ong ba ki la don kumba 2.93 lak tylli ki Post ba la sah thylli tang ha ka tnat Railways, 1.43 lak tylli ha ka tnat ki kam pohïing bad 2.64 lak ha ka tnat ïada ri,” la ong u President barim jong ka seng Congress.
Ka lawei jong ki samla kan sa long ba kin sa ïohi ïa ka jingshai hadien ba ki la dep ban pynpait ïa ka jingkah dum jong ka jingbym ïoh kam-ïohjam, u la bynrap. Ki mat treikam jong ka seng Congress ki long ban khmih bniah halor ki san tylli ki païa, kata halor ka Yuva NYAY, Bhagidari NYAY, Nari NYAY, Kisan NYAY, bad Shram NYAY kumba la kular da u Rahul.
Ka liang pyrshah ruh kan sa khmih bniah ha kaba ïadei bad ki jingkular ban ai jingmyntoi sha ki nongrep lyngba ka Minimum Support Price (MSP) bad ban pynlong ïa ka jingwad bniah na ka bynta ban kyntiew ïa kiba dang sahdien.
