Shillong, Lber 06
Ki ar tylli kol ba la thep da u Kylian Mbappe ki la biang pura ïa ka Paris Saint Germain ban jam sha ka quarter final ha ka lympung-ïalehkai Champions League hadien ba ka la lah ban pynliem noh ïa ka Real Sociedad da 2-1 kol na ka bynta ban tam da 4-1 ha ka aggregate.
Ka jingangnud ban khur ïa ka nam jop kaba nyngkong eh ha ka Champions League, ka PSG ka la wanrah ka jingkylla ha ka bynta kaba shakhmat kynthup ïa u Mbappe.
Hadien ba ka la lah ban ïalehkai bha ha ka jingïalehkai group ban long ka kynhun kaba khlem shah rem ha u snem ba la dep na ka bynta ban bat ïa ka kyrdan basaw hakhlieh ïa ka Inter Milan ha ka Group-D. Ka kynhun ïalehkai ha ka lympung LaLiga ka Real Sociedad ba bun ki rangïalehkai ki la ngat ha ki jingmynsaw bad ka la jop tang shisien na ki 10 sien ïakhun jong baroh ki lympung ïalehkai.
Te kumta ha kane ka jingïakhun pre-quarter final (2nd leg) u Mbappe u la ïoh ban lehkmen bad ban pynpaw ïa ka jingstet ha ka rukom ïalehkai ha kaba ki rangïalehkai ka Sociedad ki la shem jingeh ban khanglad ïa u. U long u rangïalehkai bym don ba lah ban khang lad ïa u bad ha ka sngi Ba-ar u la lah ban pynurlong na ka bynta ban thep ar kol. Kumta haba kheiñ lang baroh une u rangïalehkai ka France u la lah ban thep haduh 11 kol na ki 15 sien ïakhun ha ka Champions League.
“Ngi tip ba ngin ym thiah lada ngim lah ban pynurlong. Lada ka liang pyrshah ka lah ban thep kol, kan ïaleh ban pynkmen ïa ki paidbah nongkyrshan,” la pynpaw u Mbappe.
“Te kumta ngi la lah ban pynïoh jingkyrmen lyngba ka jingïoh thep kol nyngkong. Te kumta ngi sngewkmen ba ngi la lah ban jam sha ka quarter-final.”
Ha kane ka jingïakhun u Mbappe u la ïoh ban pynkhih jar nyngkong eh ha ka minit kaba 15. Hadien ba la pynbuh da u Ousmane Dembele, u la ïoh ban rah ïa ka bol shapoh box ha kaba u rangapkol ka Sociedad u Alex Remiro um shym la lah ban pyllait na ka jingshah thep.
Hynrei hadien u Mbappe u la pynbud biang ïa ka kol kaba ar ha ka minit kaba 56 bad kane ka la wan lyngba ka jingïarap lang u Lee Kang-in.
U Mikel Merino u la lah ban pynphai shi kol na ka bynta ka Sociedad ha ka minit kaba 89, hynrei ka por ka la dier ïa kane ka kynhun ban khanglad ïa ka PSG na ka bynta ban jam sha ka quarter final ha ka Champions League.
Ha kawei pat ka jingïakhun pre-quarter ka Bayern Munich ka la pynliem noh ïa ka Lazio da 3-0 kol na ka bynta ban tam da 3-1 lyngba aggregate bad jam sha ka quarter-final.
Kane ka nam jop ka la wan urlong lyngba u Harry Kane uba la ïoh ban thep ar kol ha ka minit kaba 39 & 66, katba ïa kawei pat la thep da u Thomas Mueller ha ka minit kaba 45+2.
