Shillong, Lber 06
U Myntri Rangbah ka Jylla, u Conrad K Sangma, ha ka Sngi Balang u la ong ba ki MLA ka Liang Pyrshah ki shu kwah ban wad daw namar kim sngap satia haba la jubab bad batai bniah halor ki daw bad ki nongrim jong ka jingshim ram hapoh ka ïingdorbar kaba dang shu kut mynshem bnai.
Haba kren sha ki lad pathai khubor, u Conrad u la kyntait mardor ïa ka jingkam ki MLA ka Liang Pyrshah ba ka jylla kan sa dap da ka ram ha ki snem ban wan. “Haba ki la wanrah ïa kane ka mat hapoh ka ïingdorbar, nga la dep ban batai bniah ïa kane ka jingshim ram ka sorkar, hynrei kim shym la sngap bad mynta ki la sdang ban wad daw biang,” la ong u Conrad.
“Nga la dep ban pynpaw ïa kane ha ka jingkren halor ka mang tyngka ha ka rukom kaba biang tam, nga sngew ba ki la dei ban shong ban sngap ïa ka jubab ka jong nga. Haba ki wanrah ïa ka mat, kim sngap pat ïa ka jubab ka jong nga, mynta ruh wat hadien ba la dep ban jubab, ki la wanrah biang ïa kane ka mat, te ngam tip shuh haei ba ngan jubab ïa kane ka jingkylli sha ki, ha kaba wat ki paidbah hadien ba ki la ïohi ïa ka jingwanrah ka jong nga ïa ka mang tyngka ha kato ka sngi, ki la sngewthuh,” u la ong.
U Conrad u la ong ba ka sorkar kam shym la pyntreikam ïa ki kam pynroi da ka ram hynrei ka jingïoh pisa ka sorkar jylla na ka sorkar pdeng ka la kiew bha.
Shuh shuh u Myntri Rangbah u la kdew “Ka bhah jong ngi na ka khajna ka Sorkar Pdeng ka la long arshah na ka `4,000 klur sha ka `9,000 klur ha kine ki san snem ba la leit. Ka khajna lajong ka la kiew na ka `1700 klur ha u 2018 sha ka `4700 klur kaba jan kot lai shah ha kine ki san snem. Ka bhah jong ngi na ka skhim ka Sorkar Pdeng, ka pisa ba ngi ïoh kala jan kot lai shah lada ngi shim kyllum lang ïa baroh ki skhim. Ka Externally Aided Project (EAP) jong ngi bad ka jingpynlut ka la kiew san shah haba ïanujor ïa kaei kaba long ha ki snem bala leit noh bad ki EAP watla ki dei jong ka World Bank ka dei kaba la ai sudsidy haduh 72% da ka Sorkar India. Kumta, ngi la siew tang 28% bad kane ruh kam dei ka ram. Ngi la hap ruh lypa 28% bad ka GOI ka la ai subsidy bad siew 72%”.
Ka sorkar jylla ka la lah ruh ban pyntreikam bha ïa ka pisa kaba la ïoh bhah na ka sorkar India bad kumjuh ka jingpyntreikam ïa ki kam pynroi ruh ka la kiew bun shah na ki por ba la leit.
U la ong ba ka jingshim ram ka long katkum ki kyndon jong ka Reserve Bank of India bad kito ki dkhot ka Liang Pyrshah kiba kwah ban ïoh jingpynshai ruh, un bteng ban pynshai biang.
