Shillong, Lber 06
U Bah Bindo M Lanong uba dei u MDC ba shu sieh jong ka sorkar jylla uba khlem don bad kano-kano ka seng saiñpyrthei un sa shim ïa ka rai ha kine ki khyndiat sngi ban jied ïano na ki kyrtong ba un ai jingkyrshan ha kane ka ilekshon MP Lok Sabha na Shillong Parliamentary Constituency.
Haba ïakren bad u Bah Bindo, u la ong ba mynta u la long u briew ba khlem seng hadien ba ka UDP kam shym la ithuh shuh ïa u hynrei un sa shim ïa ka rai ïano ban ai jingkyrshan.
“Kum u MDC shimet nga ïohi ba ki paidbah kim dei ban jied ïa ka BJP lada dei ha Meghalaya ne India namar shisien ba la jied ïa kane ka seng, ka jingsynshar paidbah ka la kut noh bad kan ym don shuh ka ilekshon” u la ong.
Nalor nangta, u la ong ba ynda ki kyrtong ki la mih madan hangta un sa shim ïa ka rai ïano ban kyrshan namar ka ilekshon MP hap ïoh ïa u briew uba shemphang.
U la ong ba ka kamram u MP kaba nyngkong ba un kren ïa ka jingeh jong ki paidbah ka jylla, u hap ban kren ïa ka jingeh jong ka thaiñ Shatei Lam Mihngi kaba la dep jia kum ha Manipur bad Assam.
Nalor kata, u Bah Bindo u la ong ba u MP u hap ban kren ruh ïa ka jingeh jong ka ri India hynrei lada jied ïa u briew u bym tip eiei kan buh jingeh ïa ka jylla.
Ha kajuh ka por u la kyntu ïa ki paidbah ba ki dei ban kiar ban jied ïa ka seng BJP namar kane ka seng kan sa pynduh ïa ka jingsynshar paidbah.
Kum ban shu pynkynmaw, u Bah Bindo naduh ba u la shah leh kiar ha ka UDP u la long kum u MDC shimet ba la thung da ka sorkar, hynrei mynta u la leit ban ai jingkyrshan ïa ka EC jong ka NPP ha KHADC hapoh ka jingïalam u Bah Pynïaid Sing Syiem.
Ki kyrtong kiba la pynïeng da ki seng saiñpyrthei ki long u Bah Vincent H Pala na Congress, Kong Ampareen Lyngdoh na ka NPP, Bah Robertjune Kharjahrin na UDP bad u Dr. Ricky A.J Syngkon na ka VPP.
