Shillong, Lber:
U Bah Kansing Lynshiang uba dei u ‘riew rangbah ha Mawkynrew, u la ïoh ban aiti noh ïa ka kynroh jong ka RCLP School Mawlali kaba hap ha Mawkynrew konstitwensi ha ka 5 tarik Lber kaba la pyntrei da ka Chief Minister Special Rural Development Fund ha ka jinglut kaba `6 lak.
Ha kane ka sngi la ïadonlang u Secretary ka Managing Committee u Fr. Suresh Kagoo, ki nonghikai bad ki khynnah skul bad la pynïaid ïa ka jingïalang da u Bah Melan Nongrum kum President ka Managing Committee.
Kane ka skul ka don naduh klas Nursery haduh klas-5 bad ki nonghikai ki don saw ngut.
U President ka Managing Committee u Bah Melan u la ïathuh ba ki dkhot jong ka Committee ki la trei shitom bha namar mynsngi ki leit bylla bad mynmiet ki sdang ban trei ïa ka kynroh haduh ban da miet.
Kumta u la ai khublei ïa u Bah Kansing uba la ïarap ban pynïoh jingïarap na ka skhim u Chief Minister ban shna ïa kane ka kynroh kaba don ha syndah ka surok namar ka jinglut kaba la bun kaba ki dkhot kim lah kot bor ban trei bor met.
U Bah Kansing u la ong ba kane ka jingplie paidbah ka long ban pyni ba ka kam ba la shna la dep lut khnang ba kiwei ki shnong ba marjan kin tip haba la wanrah ïa ki kam pynroi lyngba ka sorkar.
U la ai khublei ïa u Myntri rangbah ka jylla u Conrad Sangma uba la mang pisa sha kane ka skul ban shna kynroh ban shngaiñ ïa ki khynnah skul namar ka don ha syndah ka surok.
