Shillong, Lber 06
U Myntri Rangbah ka jylla, u Conrad K Sangma, u la ong ba ka sorkar jong u kan nym lah satia ban pdiang ïa kino- kino ki kam be-aiñ khamtam ha ka rukom dawa pisa.
“Hadien ba ngi la ïoh jingtip bad kane ka mat ka la wan sha ngi, ngi la shong jingïalang kyrkieh dang ha kine ki khyndiat taïew ba la dep. Ngan nym lah ban ai lut ki jingtip baroh namar ka dei ka jingïalang pohïing, ha kaba ngi la bthah ruh ïa ki pulit ba kin ïaid shakhmat ban leh tyngeh ban pynthikna ba kum kine ki kam kin nym jia shuh,” la ong u Myntri Rangbah haba kren sha ki lad pathai khubor ha ka Sngi Balang.
U Conrad u la ong ruh ba ka sorkar ka la kren shai ha u ksiang ka seng kieng atiar jong ka Hynñiewtrep National Liberation Council (HNLC) ba ka seng ka dei ban sangeh ïa ki kam be-aiñ khnang ban pynïatyllun ïa ka jingïa-kren ïasuk.
U Myntri Rangbah u la ong ba na ka liang ki pulit ki la leh ïa ka kamram ka jong ki bad ki la ïaid shakhmat, bad ha kaba ki paidbah kin sakhi ba kum kine ki kam dawa pisa kiba la don ha ki por kiba la leit, mynta ki la hiar bha, kaba ki paidbah ruh ki lah ban batai.
“Mynta ngi la don ha ka kam bad ngin pynthikna ba kine ki kam dawa pisa ki dei ban sangeh mardor bad kam dei ban ktah ïa uwei ruh u nongshong shnong jong ngi,” la ong u Conrad.
Lah ban pynkynmaw ba dang shen, u dkhot ka HNLC u Storgy Lyngdoh u la shah kem na Shillong bad na ka mobile phone jong u, ki pulit ki la lap bun ki jingdawa pisa ba la phah sha kiba bun ki briew.
Shuh shuh haba kylli, u Myntri Rangbah u la ong, “Ngi la dep ban kren shai sha ka HNLC ha kiba bun ki jingïakren lyngba u ksiang jong ngi ha kito ki por, ba lada ki long thikna halor ka jingïakren, te kum kine baroh ki kam ki dei ban sangeh mardor namar kum kine kiei-kiei ki la jia ruh kham mynshwa.
