Shillong, Lber:
Ka kynhun jong ka tnad shipai liengsuiñ ne ka Indian Air Force (IAF) ba la tip kum ka Surya Kiran Aerobatic Team (SKAT) kan sa ïashim bynta bad khring ïa ki paidbah da kaba pyni nam ïa ki sap ki phong lyngba ka ‘Air Show’ ka ban sa long ha Wah Umïam ha ka 8 tarik Lber ha ka por 8:45 baje mynstep.
Kiba bun kiwei-kiwei ki liengsuiñ ïapom bad ‘helicopter’ kin sa ïashim bynta lang ha katei ka ‘Air Show’.
Ka SKAT kaba la thaw ha u snem 1996, ka long kawei napdeng ki katto-katne ki kynhun jong 9 tylli ki liengsuiñ pyni sap ha pyrthei bad ka long ruh tang ma ka napoh Asia.
Kane ka kynhun ba kyrpang ka la ïashim bynta ha palat 500 tylli ki prokram pyni sap ha India, nalor ka jingpyninam ïa ka jingtbit jong ka tnad IAF ha ki prokram ‘Air Show’ ba shabar kum ha China, Sri Lanka, Myanmar, Thailand, Singapore bad UAE.
Ka SKAT, ka ïoh pdiang ïa ka ‘tien phira “Sadaiva Sarvottam” da kaba suk – kaba batai ïa ka jingong “Always the Best”.
Kane ym tang ba kan sei madan ïa ka sap ka phong jong ki ‘pilot’, hynrei kan pynbiang ïa ka lad ki lynti na bynta ki paidbah ban sakhi ïa ka jingminot bad ka jingtbit jong ka tnad shipai liengsuiñ.
Shuh shuh ka jingthmu jong kane ka prokram ka long ban pynsaphriang jingtip shaphang ki tnad ïada ri, ha kajuh ka por, ban ai mynsiem ïa ki samla ka ri ban pynïasoh sha ka tnad. Kane ka long katkum ka kyrwoh na u Wing Commander, PRO Defence, Meghalaya, Mizoram bad Tripura, u Sreeprakash J.
