Shillong, Lber:
Ka jingsumar bha naduh ka por ba dang pun haduh ban da kha ïa i khyllung ka dei kawei ka bynta kaba kongsan tam ïa ki longkmie ha ka jingïaid lynti ban sumar ïalade bad ïa i khyllung ban long ki bakoit bakhiah bad ban lah ban heh ban san bha.
Nalor ka jingsumar ïalade bad ïa i khyllung, ka jingaipor ïa ka met ba kan eh kan khlaiñ ka dei sa kawei pat ka bynta kaba ki longkmie ki donkam ban bud bad kata ka long ban ai ka por kaba kham jlan ïa ka met hashwa ban bud biang ka jingpun jingkha katba ka rta ka dang shah.
Khnang ba ki longkmie kin ïoh ka jingsngewthuh kaba biang, ka Sorkar Jylla lyngba ka tnat Social Welfare ka pyntreikam ïa kawei ka rukom ïalap kaba la tip kum ka ‘Shi Hajar Sngi’ ha kaba la leit sha kylleng ki shnong ban batai shaphang ka jingkordor jong ka por na ka bynta ka kmie kaba dang pun dang kha ka dei ban bud, bad ka por kaba i khyllung ba ka kha i donkam ban ïoh ka jingsumar kaba biang ha kita ki shi hajar sngi.
Kine ki shi hajar sngi ki dei ka por jong ka jingheh jingsan ka met bad ka bor pyrkhat ym tang ïa i khyllung ba la dep kha, hynrei ïa ka kmie ruh kumjuh.
“Ka jingthmu jong ka Sorkar Jylla ban wanrah kum kane ka jingpynsngewthuh hapdeng ki longkmie kiba dang pun dang kha khamtam ha thaiñ nongkyndong, ka long ba kin tip kham bha ïa ka jingdonkam ïa ka por ban sumar ïa i khyllung ba dang kha hapdeng kita ki shi hajar sngi bad hapdeng kita ki shi hajar sngi, ka kmie ka ïoh ruh ban pynkhlaiñ ïa ka bor met jong ka da kaba kiar na kaba armet biang khlem pat dei por,” la ong u Principal Secretary ka tnat Social Welfare bad ka koit ka khiah u Sampath Kumar haba ïakren bad u nongai khubor.
Ka Sorkar ka la leh ïa kane khamtam namar bun ki longkmie kiba dang kham rit ka rta kiba pun bad kha khyllung biang tang hapoh 2 snem ba ki la dep kha ïa iwei khlem da ailad ïa ka por ba kan pynkhlaiñ shwa ïa ka bor met jong ka kmie.
Ka jinglah ban ai-buiñ ka kmie ïa i khun ba dang kha ka dei ruh kawei kaba ïarap bha ïa i khyllung ban khlaiñ.
La ong ba ka jingbym khlaiñ jong ka kmie khamtam ha ka por ba pun ka buh ruh ha ka jingma ïa ka kmie bad ïa i khyllung ynda la dei ka por ban kha.
Ka jingkheiñ ka pyni ba ki don kumba 155 million ngut ki khynnah ha ka pyrthei kiba shem jingeh ban heh bad kane ka dei namarba kam biang ka jingkhiah ha ka por ba kha ïa i khyllung bad la lap ruh ba 52 million ngut ki khyllung ki duna ka jingjrong namar bym biang ka jingkhia ha ka por ba kha.
Shuh shuh la ong ba 50 na ka 100 ki kynthei kiba armet ha pyrthei ki shem jingeh namar ka don ka jingduna snam na ka jingbym biang ka rukom bam. Kane ka wan lang ruh ha i khyllung ba kha na ka kmie kaba don jingduna snam.
Ki million ki khynnah kim ïoh ïa ka bam bad ki jingbam kiba biang ban tei ban ïoh ka koit ka khiah ban ban heh ban san.
Kumta ha kine ki shit hajar sngi, ki khyllung ki donkam ban ïoh ki jingbam kiba ïarap ban pynbiang ïa ka koit ka khiah jong ki bad kumjuh ruh ka koit ka khiah jong ka kmie naduh ba ka pun haduh ban da dap ar snem tam.
