Shillong, Lber 06
Hadien ka jingshah rem da 1-3 ha ka Bangladesh, ka India ka la khmih lynti ban wanphai da ka jingkhlaiñ bor na ka bynta ban ïoh rung sha ka final ha ka lympung ïalehkai SAFF U-16 Women’s Championship ha kaba kane ka kynhun kan ïakhun pyrshah ïa ka Nepal ha ka Sngi Palei ha ANFA Complex kaba ha Lalitpur.
Wat la ka India ka la lah ban pynjemkhnap haduh 7-0 kol ïa ka Bhutan, hynrei ha ka jingïakhun ba ar kam shym la lah ban bteng ïa ka jingjop naba ka la shah rem noh ha ka Bangladesh.
“Ki ‘thei ïalehkai ki sngewsih eh halor katei ka jingshah rem,” la pynpaw u coach ka kynhun u Biby Thomas.
“Ha ka jingshisha ka kynhun ka don ïa ka jingkyrmen kaba skhem ba kan ïalehkai bha, hynrei namar ki jingbakla ka la shah thep kol ha ka Bangladesh. Wat la ngi la lah ban pynphai ha ka kylla miet, pynban ngi la shah thep biang na ka daw ka jingbym lah ban khanglad ha ka bynta kaba shadien.”
“Ha ka jingshisha ngi ka ïoh ïa bun tylli ki kabu ksiar ban ïa ka Bangladesh, bad ngi la lah ban pynurlong (kol) tang kawei. Ngi long ka kynhun kaba biang ha baroh ki bynta, hynrei ka dei tang na ka daw ka jingbym ïasngewthuh jingmut lang.”
“Ka jingïakhun pyrshah Nepal kan long kaba kham pher namar ka liang pyrshah ka don ïa ki nongkyrshan kiba khlaiñ. Kumjuh ka Nepal ka don jingkyrmen hadien ba ka la lah ban khur ïa ka jingjop ha ka jingïalehkai kaba khatduh. Wat la katta, ka la shah rem ha ka Bangladesh, hynrei ki la lah ban pyni ïa ka mynsiem ïakhun. Kane ka long ka kabu ksiar kaba ngin hap ban ïakhun tyngeh khnang ban jam sha ka final.”
