Shillong, Lber 06
Ka jingïaid lynti jong ka Kerala kaba la bat haduh hynñiew sien ïa ka nam lahduh ka la poi sha kaba kut ha ka 77th Santosh Trophy National Football Championship hadien ba ka la shah rem noh ha ka Mizoram lyngba ka ‘sudden death’ (6-7) kaba la long Golden Jubilee Stadium, Yupia kaba ha Arunachal Pradesh.
Ha kane ka jingïakhun quarter final kaba la long ha ka miet jong ka Sngi Ba-ar, baroh ar ki kynhun kim shym la lah ban thep kol haduh kaba kut jong 90 minit bad wat haduh ka extra-time.
Te kumta ban rai ïa ka nam jop la pynïashut ïa ka tie-breaker. Ha kane ruh kine ki kynhun ki la ïaryngkat mar katjuh bad dei lyngba ka ‘sudden death’ ba ka Mizoram ka la lah ban khur ïa ka jingjop.
Te kumta ka Mizoram kan pynkhreh ban ïakhun semi final pyrshah ïa ka Services ha ka sngi Palei. Katba ka Manipur kaba la jop haduh 7-1 kol ïa ka Assam, kan ïakhun pyrshah ïa ka Goa ha ka semi final ka ban long ha kajuh hi ka sngi.
