Shillong, Lber 06
U Myntri bad nongaiktien ka Sorkar MDA, Bah Paul Lyngdoh ha ka Sngi Balang u la ong ba ka Sorkar kan sa kynjoh ïa ka thong jong ka ïoh ka kot kaba 10 ‘Billion Dollar’ ha shuwa ban kut ka samoi treikam jong ka.
“Ka jingtreikam ka MDA 2.0 ka long kaba paka bad phi lah ban ïohi na ka mang tyngka kaba la wanrah da u Myntri Rangbah ka Jylla,” la ong u Bah Lyngdoh haba kren sha ki lad pathai khubor.
Haba kdew ba ka Sorkar ka don ïa ka mat treikam ha ryngkat ka thong, u la ong, “Ngi thmu ba ha kaba kut jong ka samoi treikam jong kane ka Sorkar, ka Jylla kan kynjoh ïa ka thong kaba 10 ‘Billion Dollar’ ha ka liang ka ïoh ka kot.”
U Bah Lyngdoh uba la pynsngew halor ka jingïaid shakhmat jong ka prokram ‘CM Elevate’, u la ong ba ka tnad lariti kaba la ju ñiew kum ka tnad kaba rit, mynta ka la lah ban pynïeng ïa ka ‘U Tirot Sing Library’ ha Dhaka, kumjuh ka Tagore Cultural Complex ha Shillong lem bad kiwei-kiwei.
“Ka tnad kam jngoh kai ka long kaba bunkam man ka sngi. Ngi don ïa ka MGMP kaba pynlong ïa ki prokram ka put ka tem bad kaba la pynïadon bynta ïa kumba 3000 ngut ki khun samla,” u la ong.
Ha kajuh ka por, u la ïathuh ba ki don kumba 50,000 ngut ki briew kiba ïadon bynta bad ka tnad kam jngoh kai.
U la ong ruh ba kine baroh ki dei ki mawmer kiba khraw, bad ka jinglah ban pynurlong ïa ki ha ka shi snem ka long kaei-kaei kaba hap ban ai jingïaroh.
Haba kylli, u la kular ba ka Sorkar kan sa pynkhuid ïa ki ram da kaba pyntikna ba ka don ruh ka jingpynmih khajna na ki (ram).
“Lada phai khmat sha ka projek kaba kum kane, ka dei tang lyngba ka MDA 2.0 ba ngi la siew ïa ka bhah ba dei ai ka Jylla kaba la pynlah ne pynurlong ïa kane ka Complex ban ïaid shakhmat,” la ong u Myntri.
