Khliehriat, Lber 07
Ka Joint Action Committee (JAC) jong ki shnong bapher bapher ba don ha shilynter ka surok bah NH-6 ki la weng noh ïa ka jingkhang surok kaba 24 kynta hadien ba ka NHAI ka kular ban maramot ïa ka surok hapoh 3 sngi. Kane ka jingïakhih khang surok ba 24 kynta ka la sdang naduh 6 baje mynstep jong ka 7 tarik Lber ban pyrshah ïa ka sorkar jylla bad ka NHAI halor ka jingpulom ban maramot ïa ka surok bah kaba la julor bad jot rathai khamtam naduh Lumshnong haduh Raracherra, East Jaiñtia Hills.
Ki shnong kiba hap hapoh ka JAC ki kynthup ïa ka Dorbar Shnong Ratacherra, Dona Umbluh, Dona Skul, Umkiang, Lumphyllut, Lumsoski, Pyrtakuna, Borsara, Kuliang, Shymplong bad Tongseng. Ki paidbah nongshong shnong shynrang bad kynthei jong kitei ki shnong kumjuh ki khynnah skul ki la mih sha surok ban khang ïa ka jingïaid jong ki kali ki motor lyngba katei ka surok.
Ha ka por nohphai sngi, ki bor pynïaid District ha ka jingïalam u Majistor Bah G Warjri ryngkat ki briew jong ka NHAI ba la mihkhmat da u Manager Technical u Biswa Jyoti Lahkar ki la hiar sha Umkiang ban ïakren bad ki nongïalam jong ka JAC. Haba ïakren bad u Chairman jong ka JAC u Bah Lasting Pala uba dei ruh u Waheh Shnong jong ka Umkiang u la ong, ka JAC ka la sangeh shipor ïa ka jingkhang surok hadien ba ka NHAI ka la kular hakhmat ka JAC bad paidbah nongshong shnong ban sdang pyntrei noh ïa ka surok NH-6 naduh ka Lah Sngi U Blei.
U la ong lada ka jingpyntrei ïa ka surok kam sdang kumba la kular hapoh ka 3 sngi, ka JAC kan bteng biang ïa ka jingïakhih kaba khlem buh por.
