Shillong, Lber 07
Ki pulit na thanat Sadar ha ka jingdonlang ki sakhi ki la lap ïa ka met jong uwei u briew napoh ka kamra jong ka Hotel Assembly kaba don ha Khyndailad.
Haba ai ïa kane ka jingtip mynta ka sngi, u SP ka East Khasi Hills u Rituraj Ravi u la ong ba ki nongtrei jong katei ka ïing basa ki la pyntip sha ki pulit hadien ba uwei u briew uba la leit sah ha katei ka ïing basa u khlem mih napoh kamra la palat shi sngi.
Na ka liang ki pulit ka thanat Sadar ha ka jingdon lang ki sakhi ki la plie ïa ka kamra ba sah da uta u briew bad ki la lap ba u la khlad. Ïa ka met jong une u briew la lap na ka jingthiah.
Hadien ka jingpeit bniah, ki pulit ki la pyntip ba utei uba khlad u dei ba la tip kyrteng kum u Sijo Joseph, 47 snem ka rta na Beltola Road kaba don ha Guwahati.
U SP u la ïathuh ba na ka jingpeit bniah la suba ba ka jingkhlad jong utei u briew ka dei namar ba u la dih bun palat ki dawai ba la tip kum ki Sedatives bad Anti Depressants. U la ong ruh ba ym don satia ki dak ki shin ha ka met ba u la shah leh sniew ha kiwei pat.
Ïa ka met jong utei uba la khlad la rah noh ban leh ïa ka post mortem bad la ai jingtip ruh sha ki bahaïing hasem jong u halor kaei kaba la jia. U SP u la ong ruh ba ki pulit ki la sdang ban pynlong da ka jingtohkit halor katei ka jingkhlad noh jong u Sijo Joseph.
