Mawkyrwat, Lber 07
Ka Nonglang Sports Club ka la pynkut noh ïa ka lympung ïalehkai phutbol Inter Dong jong ki samla na bynta u snem 2023-24 ha ka Sngi Balang ha madan Pyndenïew Lyngdoh Nonglang, South West Khasi Hills. Ha kane ka sngi ka jingïalehkai phainal ka la long hadpdeng ka Dong Nongdom bad ka Dong Pyndenjathang ha kaba ka Dong Nongdom ka la lah ban pynliem noh ïa ka Dong Pyndenjathang da 5-4 kol.
Kum ban shu pynkynmaw, kine ar tylli kynhun ki dei kiba la ïalehkai ha ka sngi plie jong kane ka lympung bad ka Dong Nongdom ka la jop da 2-0 kol ïa ka Pyndenjathang. Kumta ha ka phainal ruh kin ïakynduh biang sa shishien ban aireng.
Haba phai pat sha ka jingïalehkai phainal ha katei ka sngi ka jingïalehkai ka long kaba itynnad bad ïakhaid. Kine baroh ar tylli ki la ïoh ban thaw ïa ka rekod na bynta ban ïathep bun kol eh ha ka Inter Dong ba la pynïaid da ka Nonglang Sports Club naduh mynshwa haduh mynta ha kaba ka Dong Nongdom ka la lah ban thep 5 tylli ki kol katba ka Dong Pyndenjathang 4 kol.
Ïa kane ka Inter Dong la pynïalehkai da ka league system bad ki don kumba 10 tylli ki dong kiba la ïashim bynta.
Ïa kane ka lympung la wan ban pynhap pyrda da u Bah Damang Syngkon, District Sports Officer, South West Khasi Hills kum u kongsan ha ryngkat ka jingdonlang u Bah Avin Wanbah, BADO Ranikor, Bah Firsterlin Kharraswai, Myntri shnong Nonglang, Bah Kordorlyne Kharlyng-doh, Secretary Nonglang Sports Club bad kiwei kiwei rangbah jong ka shnong.
