Shillong, Lber 07
Ka President jong ka Ri, ka Droupadi Murmu ka la pynkup burom da ka khusnam Sangeet Natak Akademi Awards (Akademi Puraskar) na ka bynta u snem 2022-2023 sha 91 ngut ki barikor ba pawkhmat (ar tylli ki khusnam ba la ai lang ïa ar ngut) ha ka kam performing arts.
Ïa kane ka jingïalang pynkup burom la pynlong hynnin ka sngi ha Vigyan Bhawan, New Delhi. Ha kane ka sngi, ka Kong Helen Giri na Meghalaya ka la ïohpdiang ïa ka khusnam Sangeet Natak Akademi jong u snem 2023 na ka bynta ka jingnoh synñiang sha ka put ka tem tynrai jong ka jylla Meghalaya.
Ïa i Kong Helen Giri la kha ha ka 7 tarik Rymphang 1944, bad i la long barikor ba tbit ha ka put ka tem tynrai na Meghalaya, bad ki paw bha namar ki sienjam ban kyntiew bad pynneh ïa ki jingshad Khasi tynrai. Kum ka nongrwai tynrai ba pawnam jong ka All India Radio, i la don ka bynta kaba khraw ha ka jingwanrah ïa ka put ka tem Khasi tynrai sha ki rynsan jong ka ri. Ki jingïashim bynta jong i kum ka nongrwai ha ka jylla, hapoh ri bad shabar ri ka la wanrah ka jingithuh.
Lyngba ka jingtrei shitom jong i, i la wanrah ka jingpynthymmai ha ki kam saiñdur bad ki kam kiba ïadei bad ka deiriti khamtam ha ki dustur tynrai jong ki Khasi. Shuh shuh, i la shim ïa ki sienjam ban wad ïa ki nongsaiñ dur ba la tbit bha kiba la ïoh jinghikai pyntbit ha ki thup bapher bapher jong ki tiar tem. Kane ka jingpyrshang ym tangba ka la pynneh-pynsah ïa ka jingsaiñdur ïa ki tiar hynrei ka la long ruh kum ka lad kamai kajih ha ki shnong ba i la kyrshan. Ki jingnoh synñiang jong i, ki la kyntiew ïa ka jinglong ka deiriti jong ka jylla Meghalaya.
I Kong Helen Giri, i la ïoh pdiang ïa ka khusnam Padma Shri na ka bynta ka jingnoh synñiang jong i sha ki kam saiñdur bad ki kam kiba ïadei bad ka deiriti jong ka Meghalaya ha u snem 2008.
Nalor ka khusnam Sangeet Natak Akademi Awards, ka President ka la pynkup burom ruh ïa ka khusnam Sangeet Natak Akademi Fellowship (Akademi Ratna) sha ki barikor halor ka jingnoh synñiang jong ki bad kine ki kynthup ïa u Vinayak Khedekar, Goa Indian Music, R Visweswaran, Karnataka ha ka Indian Music, Sunayana Hazarilal, Maharashtra ha ka Indiana Dance, Raja & Radha Reddy, Delhi ha ka Indian Dance (Joint Fellowship), Dulal Roy, Assam ha ka Indian Theatre bad DP Sinha, Uttar Pradesh ha ka Indian Theatre.
Kine ki jingpynkup burom ym tang ki long ka dak jong ka kyrdan kaba heh tam ha ki jingjop bad ka dei ruh ka jingithuh jong ka jingtrei shitom bad ka jingnoh synñiang.
