Shillong, Lber:
Ka Confederation of Ri Bhoi People (CoRP) Sengkmie ka dawa ïa ka MeECL ban pyntreikam noh ïa ka Sub Station ba 33 KV ha shnong Umsong, Ri Bhoi District, khnang ba ki paidbah ka thaiñ Ri Bhoi Sepngi kin ïoh bording ilektrik thikna kumba long kiwei ki jaka.
Ha ka jingjurip ka seng ka la lap ba ïa katei ka sub station ba 33 KV la shna naduh u snem 2004 na bynta ban sam bording ha ka thaiñ Ri Bhoi Sepngi, hynrei haduh mynta ka dang treikam kum ka sub station ba 11 KV. Kumta ki paidbah ka thaiñ kim ju ïoh thikna ka bording ilektrik bad bun ki shnong ki shong dum, kumba long mynta ka jingduh bording ka jia khah-khah ha ka thaiñ bad kane ka lah ban dei na ka jingtlot ka bording ilektrik namar la pyntreikam da ka 11 KV ha jaka jong ka 33 KV.
Ha kajuh ka por, ka seng ka pynpaw ka jinglyngngoh ba ki bor MeECL ki la ïathuh ha ki snem ba la dep ba katei ka laiñ ka la poi haduh Lailad, hynrei haduh mynta kam pat pynpoi ha shnong Umsong. Namarkata, ka kyntu jur ïa ka MeECL ban pyndep kloi ïa ka laiñ bording ba 33 KV, khnang ba ki paidbah ka thaiñ kin ïoh tikna ïa ka bording ilektrik.
Halor kane, ka seng kan sa buddien balei ka MeECL ka shim por da ki snem ban pyndep ïa ka laiñ jong ka 33 KV na Nongpoh sha Umsong, kane ka pynpaw ba ka MeECL ka kheiñ sting ïa ki paidbah ka thaiñ Ri Bhoi Sepngi. Namar wat ka shlem treikam jong u SDO kaba la mang ban buh ha Patharkhmah haduh mynta kam pat pyntreikam.
Ha ka jingleit jurip, ki nongtrei ka MeECL ba dei peit ïa ka sub station, ki la ïathuh ba la pyntreikam shipor da ka lain ba 33 KV, hynrei hadien katto katne bnai kam shym la treikam shuh na ka jingthud ki sainar namar ïa ka lain la pynïaid na khlaw bad la palat 6 snem ka treikam tang da ka 11 KV bad kane ka buh jingeh ban pynbiang bording ïa ki paidbah ka thaiñ.
