Shillong, Lber 07
Kawei ka samla kynthei ba dang pule ha North Eastern Hill University (NEHU) Shillong, ka la shah kit halor ka khoh ha uwei u rangbah na ka shnong Nongpriang kaba don ha ki thaiñ Sohra haba ka wan ïarap kam ne ban long volunteer ha Monolith Festival kaba la sdang ha ka Sngi Palei ka 7 tarik u Lber 2024 ha Khasi Heritage Village kaba don ha syndah ka ‘law kyntang ha Mawphlang, East Khasi Hills District.
La ïohi ba kane ka samla haba ka shong hajrong ka khoh ka phuh samrkhie haba ki paidbah ki peit ïa ka hynrei ma ka pat ka dang bat ïa ka mobile ha kti ban shondur. Haba ïoh ban ïakren bad une u rangbah, u la ïathuh ba kane ka khoh ban kit briew ha kane ka tamasa ka long ban pyni ba ha shnong jong u ïa ki briew la shu kit da ka khoh haba ym pat don surok kali.
Nalor nangta, u la ïathuh ba ha kane ka tamasa u shim `100 lada shong marwei ban ïaid ïa kane ka jaka ha Mawphlang. U la ïathuh ruh ba u la ïoh ban kit kumba saw ngut ha kane sngi sdang jong ka tamasa.
“Ngam don ka jingthait namar ngi la mlien ban kit briew ha shnong” u la ong.
Katba na liang katei ka samla ka la ïathuh ba ka sngewtynnad ban shong hajrong ka khoh, ka long kumba kynoi thiah haba u rangbah u ïaid sawdong ïa kane Khasi Heritage Village.
Ka la ïathuh ba ka wan sha kane ka tamasa ryngkat ki para ba leit pule lang ha NEHU.
