Ka artikle 25 bad 26 jong ka riti synshar ri ka kren shai, ba uno-uno u briew u lah ban ngeit lane ban kren bad ban ïalap ïa ka niam kaba u ngeit. Kane ngi sngewthuh shai kano-kano ka jait niam ka lah ban leh niam leh rukom bad ban pynphriang ïa ka jingngeit jong ki hapoh ka ri. Ka niam Khasi bad Khristan ki lah ban ïalap bad pynphriang ïa ka jingleh niam jingleh rukom khlem ka jingshah pynbor hano-hano ruh. Kumjuh ka niam Muslim ka niam Hindu bad kiwei kiwei ruh ki jait niam ki lah ban ïalap bad pynphriang ïa ka jingngeit niam ha ki briew baroh. Ym dei ban don ka jingsngew pher niam kawei ïa kawei ka jingngeit ka dei ban don ka jingburom mar kylliang ïa kano-kano ka niam. Lada ngi lah ban leh kumta ka long ba ngi bud bad kohnguh ïa ka riti synshar ri kaba la bsut kyrpang ha ka riti synshar ïa kane ka kyntien Secularism. Ka mut ka bym don ka jingsngew pyrshah ïa kano-kano ka niam ba kin seng bad pynphriang hapoh ka ri. Hynrei lada ïa kawei ka niam ngi shah ïa kawei pat ngim shah bad ngim ai lad kata ka long beaiñ be riti. Namar secular country ka mut ka jingshngain, ka jingïaryngkat bad kaba ai kylluid ïa baroh ki jait niam. Kane ka long ka jingsngewthuh jongnga shimet.
C. B. Iawphniaw
