New Delhi, Lber:
Ka ïingbishar ha Delhi ha ka Sngi Palei ka la hukum ïa u Myntri Rangbah u Arvind Kejriwal ba un leit mih hakhmat jong ka ha ka 16 tarik, Lber hadien ba ka kynhun Enforcement Directorate (ED) ka la phah sa da kawei ka jingmudui shi sngi hashwa ka jingshah bishar jong u namar ka jingïaidlait halor ki jingshah khot hajir namar ka jingdonkti ha ka jingjia jong ka jingkamai ïa ka spah bymhok kaba la mih na ka jingbym pyntreikam hok ïa ka kam ha ka tnat Excise ha Delhi hapdeng u snem 2021-22 kaba la shah pyndam noh mynta.
Ka Additional Chief Metropolitan Magistrate ka Divya Malhotra ka la ïoh jingthoh ha kaba ïadei bad ka jingmudui ha kaba ka la hukum ïa u Kejriwal ba u la dei ban leit mih markhmat hapoh ka ïingbishar.
U Kejriwal kham ha shwa u la shah hukum ba u la dei ban leit mih hakhmat ka ïingbishar ha ka 16 tarik, Lber ha kaba ïadei bad ka jingmudui jong ka kynhun ED ba la phah ha ka 3 tarik, Rymphang. Ka kynhun ED ka la ong ba u Kejriwal um dei hok ban tip la u la shah khot hajir na ka bynta ban long kum u nongsakhi ne uba la shah kynnoh donkti ha ka kam bamsap.
