Shillong, Lber 07
Ka KSU Laban Circle ha ka 6 tarik u Lber, 2024 ka la leit ban buh da ka dorkhas ha u Chairman ka Meghalaya Energy Corporation Limited (MeECL) bad ka la ïoh ruh ban kynduh ïa u Director ka MePDCL ban ujor halor ki briew ba sah be-aiñ ha Maxwelton Estate kiba tuh bording ilektrik.
Na ka liang ka MeECL ka la phah ïa ka kynhun ka jong ki ha ka step jong ka 7 tarik, u Lber 2024 ban peit bad khmih halor kane ka jingujor. Na ka liang ka MeECL ka la lap ba ka don shisha ka jingtuh bording ilektrik hapoh kane ka jaka ha kaba la lap ba ki don ki ïing na uwei u meter ilektrik ki ai bording sha 14 tylli ki ïing, don kiwei kiwei pat kiba ai bording sha 4-5 tylli ki ïing bad kumta ter ter.
Ha katei ka jingleit khmih, na ka liang jong ka MeECL ka la ot bor ding lut ïa baroh kine ki ïing kiba tuh bording bad kin ai ruh da ki jingthoh ïa kine ki briew ha kine ki sngi ban shah daiñ kuna.
Na ka liang ka MeECL ka la lap ba ki don 27 tylli ki ïing kiba biang u meter bording kata 20 tylli ki dei postpaid bad 7 tylli ki dei prepaid. Kine ki ai pat sha kumba 50 tylli eiei ki ïing (re-sale) kaba long be-aiñ. Kumta na ka liang ka MeECL ka la ot noh ïa ka bording jong kine 50 tylli eiei ki ïing.
Ka Seng ka ai jingïaroh bad ka sngewnguh shibun ïa ka jingkit khiah bad ka jingkloi jong ka tnad MeECL ban hiar jurip ban leh ïa kaba donkam.
Na ka liang ka seng kan sa leit ban buh ruh da ka dorkhas sa shisien khnang ba kine ki briew ki nym ïoh ban leh ïa ka bording khlem ki kot ki sla ba biang bad khlem da ïoh ïa ka No Objection Certificate (NOC) na ka Dorbar Shnong bad ha kajuh ka por ruh ban pan jingpynshai ba kumne kine kiwei ki 27 tylli ki ïing ki la ïoh ilektrik bording bad ka kot ka sla kaba kumno ki ai ban ïoh, khamtam ïa kiba leh ïa ka Prepaid Connection kiba dang shu aplai dang shen.
Lyngba kane ka kyrwoh, ka seng ka la kyntu ruh ïa ka Shillong Municipal Board (SMB) ban weng noh ïa ki masi na katei ka jaka katkum ki kyndon aiñ kumba la kular hakhmat ka Deputy Commissioner (DC) ka East Khasi Hills Distrct, ka Kong R M Kurbah ha ka 29 tarik u Rymphang, 2024. Ka seng ka la byrngem ruh ba lada ka SMB ka pynslem halor kane, ka seng kan sa pynlong da ka jingïakhih hakhmat ka shlem treikam jong ka SMB.
