Shillong, Lber 07
Ki skul SSA ki bym don khynnah kin sa duh noh ban thungkam biang ïa ki nonghikai namar kim don ki khynnah kiba pynrung kyrteng ban wan pule.
Ïa kane la ïathuh da u Myntri ka tnat pule puthi, u Rakkam A Sangma hadien ba ka Sorkar ka la lap ba ki don ki skul SSA ki bym don khynnah satia.
Dang shen ka Meghalaya SSA Schools Association (MSSASA) ka la dawa na ka Sorkar ba ka dei ban thung nonghikai lut ban pyndap ïa ki jaka ba thylli ha ki skul SSA has kane ka Jylla.
U la ai nuksa ba tang ha konstitwensi jong u ki don ym duna ïa 10 tylli haduh 15 tylli ki skul SSA ki bym don khynnah.
U Myntri u la ong ba ki don palat 1,000 tylli ki kam nonghikai ha ki skul SSA kiba thylli namar ki don ki nonghikai ba shongthait lane ki don ki nonghikai kiba la shah shim noh sha kiwei pat ki tnat lane ki don kiba la shah thungkam pura.
Kumta la bthah ïa ki DMC (District Monitoring Committee) ban ai ka kaiphod kaba biang bad shim jingmynjur na ka Sorkar haba don ka jingpynrung kyrteng ïa ki khynnah katkum ka jingdonkam.
U la ong ba ym tang ki skul SSA hynrei ki skul LP ka Sorkar ruh ki don ki bym don khynnah bad ïa ki nonghikai na kine ki skul la wanrah noh sha kiwei ki skul.
“Ka jingshisha ka long ba ki nonghikai ki diaw lada ym don ki khynnah ba kin hikai bad ki nonghikai ki kmen haba don ki khynnah ba kin ïoh ban hikai,” la ong u Myntri.
