Nongstoiñ, Lber:
Ka tnat pynïaid kali (traffic) jong ka Nongstoiñ ha ka Sngi Balang ka la bthah ïa baroh ki kali tourist ba ki dei ban kyntiew bad pynhap ïa ki nongshong kali (passenger) na ka Mandiwat Parking Lot kaba dei ka jaka ïeng jong ki kali tourist kiba kamai Nongstoiñ-Shillong bad ki kali kamai kiba leit sha Eastern West Khasi Hills District. Ki dkhot ka JAC Nongstoiñ Tourist Association haba kren halor kane ka phang, ki la ïathuh ba katei ka jingbthah na ka tnat pulit pynïaid kali kan sdang treikam noh naduh lashai ka sngi ka 7 tarik u Lber, kata ban ym shah kyntiew ne pynhap nongleit nongwan shuh sha Non-Bah khnang ba kan pynduna ïa ka jingdheng kali ha sor Nongstoiñ.
Namarkata, la kyntu ruh ïa baroh ki nongshong kali ba kin ïatreilang bad ki nongñiah kali khnang ba kan wanrah ïa ka jingbha ha baroh ki liang.
