Jowai, Lber 07
Haba ïasnohkti lang bad ki nongshong shnong, ki seng na ka Rilum Jaiñtia halor ka jingdawa jong ki ban pynrung lang ïa ka ktien Jaiñtia ha ka jingrwai State Anthem jong ka jylla Meghalaya, ka Jaiñtia Hills Autonomous District Council (JHADC) ka la mynjur ïa ka rai (resolution) ban dawa na ka Sorkar Jylla ban pynrung ïa ka ktien Jaiñtia ha ka State Anthem khnang ban pynneh pynsah ïa ka lariti jong ki Jaiñtia.
Haba wanrah ïa kane ka rai ha Dorbar Mang Tyngka ha ka Sngi Palei, u Chief Executive Member (CEM) ka JHADC u Bah Thombor Shiwat u la ong, ha jingrakhe ïa ka jingdap 52 snem jong ka jingïoh jylla ha ka 21 tarik u Kyllalyngkot mynta u snem, ka Sorkar ka la pyllait paidbah ïa ka State Anthem kaba ar minit bad katei ka Anthem ka kynthup ïa lai tylli ki jait ktien kata ka Khasi, ka Garo bad ka English hynrei ïa ka ktien Jaintia khlem lah kynthup ha katei ka State Anthem.
U CEM u la ong, ka jylla Meghalaya ka kynthup ïa lai tylli ki jaidbynriew kata Khasi, Jaiñtia bad Garo bad ka jingbym kynthup lang ïa ka ktien Jaiñtia ha ka Anthem ka la wanrah ïa ka jingsngew shah ieh beiñ ne shah kyntait hapdeng ki nong Jaiñtia. U la ong ka jaidbynriew Jaiñtia ka don ïa la ka histori ka kolshor bad ki rukom pynïaid jaka puta bad ki rukom synshar khadar kaba kyrpang bad kumta kane ka jingbym kynthup lang ïa ka ktien Jaiñtia ha ka State Anthem ka la pynkthang mynsiem bad jingbym sngewhun hapdeng ki nong Jaiñtia.
U CEM u la ong kumta ka JHADC ka rai ban mynjur ïa kane ka Resolution ban dawa na ka Sorkar ban kynthup ïa ka ktien Jaiñtia ha ka State Anthem khnang ban pynduh noh ïa ka jingsngew shah leh meinah kaba la rung ha ka mynsiem ki nong Jaiñtia bad pynneh pynsah ïa ka jingshongsuk shong shngaiñ hapdeng ki jaidbynriew bapher bapher.
Haba kyrshan ïa kane ka rai, u MDC ka Jowai North u Bah B Chyrmang u la bynñiaw halor ka jingbym kynthup lang ïa ka ktien Khasi ha ka State Anthem haba ki Jaiñtia ki don la ka jong ka District Council bad ki riti synshar khadar bad ki riti, ki kolshor bad ki rukom ngeit kiba kyrpang.
Haba kyrshan ïa kane ka rai, u MDC ka Jowai Central u la kylli hato ka Executive Committee ka la phah ne em sha ka Sorkar Jylla ban ithuh noh ïa ka dak thoh ne alphabet jong ki Jaiñtia kaba la mynjur da ka JHADC (ha u snem 2021) “namar lehse ba ngim don ki dak thoh jong la jong ka Sorkar ka la kyntait ban kynthup lang ïa ka ktien Jaiñtia ha ka Anthem.”
Haba jubab ïa ka jingkylli utei u MDC, u CEM u la ïathuh ba ka Executive Committee ka la dep phah jingthoh sha ka Sorkar Jylla ban ithuh noh ïa ki dak thoh bad mynta ka dang sahkut ha ka tnat Law jong ka Sorkar Jylla.
Baroh ki MDC ki la sngewdei ïa kane ka rai bad kumta ka Council ka la mynjur ïa ka bad ban phah sha ka Sorkar Jylla bad sha u Lat ka Jylla Meghalaya.
