New Delhi, Lber:
Ka Supreme Court ka la mynjur ban buh jingthoh bad ban bishar bniah halor ka jingkyrpad jamin jong u Symbud Myntri Rangbah barim jong ka Delh u Manish Sisodia, ha ka mukotduma halor ka jingjia kaba la mih na ka jingdkoh treikam hapoh ka tnat Excise.
U Senior Advocate Abhishek Manu Singhvi, uba la mihkhmat na ka bynta u nongïalam jong ka seng Aam Aadmi Party (AAP) u la ïathuh ha ka kynhun nongbishar jong u Chief Justice of India (CJI) u DY Chandrachud ba ka ïingbishar kaba tohkit ka la buh shwa ha kaba ïadei bad ka jingkyrpad jamin kaba mynta jong u Sisodia da kaba ong ba kane ka jingkyrpad jamin ha kaba ïadei bad ka jingphah sumar jong u ka dang sah khlem pat bishar da ka ïingbishar ba hakhliehduh.
U CJI u la kular ïa u ba un buh jingthoh kham kloi katba lah na ka bynta ka jingbishar bniah halor ka jingkyrpad jamin jong u. Hadien ba ïa ka jingkyrpad jamin jong u Sisodia la kyntait da ka SC, u la phah noh da ka jingkyrpad jamin ha kaba ïadei bad ka jingphah sumar jong u, kum ka lad kaba khatduh na ka bynta ban pynibor pyrshah halor ka jingshah kyntait ka jingkyrpad jamin jong u kaba hashwa.
U Sisodia u la shahkem ha ka 26 tarik, Rymphang, 2023, halor ka jingshah kynnoh ba u la donkti ha ka kam bamsap ha kaba ïadei bad ka jingpyntreikam ha ka tnat Excise ha Delhi jong u 2021-22 hadien ki jingshah kylli jingkylli ba bun.
