Shillong, Lber 07
Ha kawei ka jingjia kaba dei ban pynlong ïa kiwei ban husiar, ki pulit ki la ïoh pdiang ïa ka jingujor na kawei ka longkmie ha kaba ka la batai ba kumno ka la shah shet kylla ha uwei u bar jylla halor ka kam kali.
Ha ka jingujor, katei ka longkmie ka la kynnoh ba uwei u briew ba la tip kyrteng kum u Mohamad Fareed, u la wan sha ka da kaba kyrpad ba kan long lem kum ka nongbah khlieh na ka bynta jong u namar u don jingthmu ban thied kali thymmai. Ban leh ïa kane ka kam, une u briew u la ai ruh ïa ka da ka pisa T.50,000.
Hynrei, katei ka longkmie, hadien katto-katne por, ka la sngewthuh ba u Fareed u la shet shukor ïa ka da kaba phah soi ha ki kot ki sla na ka bynta ban thied ïa ka kali Maruti Eeco Van bathymmai. Ha ka por ba u la phah soi, utei u bar jylla u khlem batai satia ïa ka aïu la thoh ha kita ki kot ki sla.
Nalorkata, ka la pyntip ba ka la ïoh jingtip na ka shlem die kali ba ïa katei ka kali Maruti Eeco Van la dep ban thied ha ka kyrteng jong ka.
