Bengaluru, Lber:
Ka National Investigation Agency (NIA) ha ka Sngi Balang ka la pyllait paidbah ïa ka dur jong u briew u bym shym la lah ban ithuh bad uba la shah suba ba u la buh bom ha Rameshwaram Cafe ha Bengaluru ha ka 1 tarik, Lber, kata ha ka Sngi Thohdieng jong ka taïew ba la dep bad la rai ban ai ka buskit kaba `10 lak sha ki riewpaidbah kiba lah ban ai jingtip shaphang jong u ne ban ïarap ha ka ban ïohkem ïa u.
Ha ka jingbthei une u bom ki la don kumba 10 ngut ki briew kiba la mynsaw ha ka Cafe kaba don ha Brookfield, ha East Bengaluru. Ka kynhun NIA ka la dep ban pynlong ïa ka jingtohkit ha kine ki sngi ba la lah. Kum shi bynta ban pan jingïarap ha kaba ïadei bad ka jinglum jingtip shaphang u nongpynbthei bom ha ka jingthoh ba la phah lyngba ka rynsan phah khubor ka X ha ryngkat ka dur jong u runar, ka kynhun NIA ka la kular ban buhrieh ne yn ym pynithuh ïa ki briew kiba lah ban ai jingtip shaphang jong u.
Ym slem hadien ka rai jong u Myntri Rangbah jong ka jylla Karnataka u Siddaramaiah ba un aiti ïa ka jingtohkit ha ka kynhun NIA, lada donkam, kane ka kynhun ka la ïoh jingbit bad ïaid shakhmat ban pynlong ïa ka jingtohkit ha kaba ïadei bad ka jingjia jong ka jingbthei bom ha Rameshwaram Café.
Kum shi bynta ban bteng ïa ka jingpyntreikam, kane ka kynhun ka la ïaid shakhmat ha kaba ïadei bad ka jingtohkit ha kaba ha kine ki khyndiat sngi ka la sdang ban pynlong ïa ka jingleit khynra sha kylleng ki jaka kiba don ha Chennai bad Bengaluru, haduh ba la thoh ïa ka khubor ym pat don mano mano ruh ban shahkem ha kaba ïadei bad ka jingjia.
