Washington, Lber:
Ka ïingbishar ba hakhlieh duh (Supreme Court) jong ka United States ha ka Lah Sngi U Blei ka la pynsangeh treikam shipor ia ka aiñ kaba ju ai bor ia ki pulit ba kin kem ia ki phetwir kiba leit rung be-aiñ sha United States lyngba u khappud jong ka US bad Mexico. Ia katei ka aiñ kaba la ju tip kum ka ‘Senate Bill 4 (SB-4)’ la ju pyntreikam bha hapoh US namar ka jingleit rung be-aiñ jong ki phetwir na Mexico ka ju jur bha.
Kumta la ong ba katei ka ïingbishar Supreme Court jong ka US ha kane ka por ka la phah pynsangeh noh shwa shipor ia ka jingpyntreikam ia katei ka aiñ tad haduh ka 13 tarik jong u Lber ba ka ïingbishar kan da ioh ban peit thuh bha halor kane ka mat bad ka jingtreikam lane ka jingdonkam jong kane ka aiñ ba la buh baroh shi katta.
Namar la ong ba katei ka aiñ ka la kheiñ be-aiñ bad ñiew kam runar ia ka jingleit rung be-aiñ jong ki phetwir na shiliang sha shiliang khappud bad ban rat dyngkhong ia katei ka jingleit rung be-aiñ jong ki paidbah nongshong na kiwei pat ki ri shapoh jong ka United States, ka Texas ka la wanrah da katei ka aiñ khnang ban lah ban tehlakam ia kita baroh.
Kumba la iohi ruh ba ka ilekshon ban jied President thymmai ha US ka la jan bad kan long ha une hi u snem, bad kumta ki la don ki seng bad ki nongialam ka liang pyrshah kiba la kdew kti bad pharep ia u Biden haba iadei bad ka jingjur ka jingleit rung tuh bad jing-leit rung be-aiñ ki phetwir na khappud jong ka US bad Mexico ha kine ki snem.
