Shillong, Lber 07
Ka Donkin ka la jam sha ka final ha ka lympung ïalehkai First Division Shillong Cricket League, hadien ba ka la lah ban pynliem noh ïa ka Young Guns da 4 wiket ha ka Sngi Palei.
Kane ka kynnhun ka la lah ruh ban pynthikna na ka bynta ban kiew kyrdan sha ka Super Division ka ban ïoh ïashim bynta naduh u snem ban wan.
Ha kane ka jingïakhun semi final kaba la long ha madan Polo, ka Young Guns ka la kam trai ban tied nyngkong ha kaba ka la ïoh 165 run bad shah pynhap 10 wiket ha ki 39.4 over. U Rudra S. Rathore u la lah ban tied 84 run na ki 111 bol bad u Aditya Singh u la ïoh 23 run na ki 35 bol. Ha ka liang ki nongkawang bol, u Pynkop bonney u la shim 3 wiket bad 1 wiket da u Md Muqsodul.
Haba wan shimti ïa ka pali ba ar, ka Donkin ka la kynjoh sha ka thong da kaba ïoh 166 run bad shah pynhap 6 wiket ha ki 33.3 over. U Rohit Rai u la tied 40 run na ki 43 bol bad u Baremdor L.S Lyting u la ïoh 27 run na ki 40 bol. Katba u Mickey Lyngdoh u la khur 2 wiket bad 1 wiket da u Rudra Singh Rathor. Ïa ka nam Player of the Match la khur da u Rohit Rai.
Kawei pat ka jingïakhun semi final kaba ar kan long ha ka sngi Thohdieng ka Malki pyrshah ïa ka Lumpyngngad.
