Shillong, Lber 07
Ka Services kaba la bat teng ïa ka nam lahduh haduh hynriew sien ka la jam biang sha ka final ha ka lympung ïalehkai 77th NFC na ka bynta ka Santosh Trophy ha ka Sngi Palei ha Golden Jubilee Stadium.
Wat la kane kynhun ka la ïalehkai sa tang shiphew ngut ki rangïalehkai naduh ka minit 88, pynban ka la lah ban pynliem noh ïa ka Mizoram da 2-1 kol ha ka semi final kaba nyngkong .
Ha kane ka jingïakhun ka Services ka la ïakhun tyngeh naduh kaba sdang ha kaba ka la ïoh ban pynkhih jar nyngkong eh lyngba u Rahul Ramakrishnan ha ka minit kaba 21. Kane ka shi kol ka la ïai neh haduh kaba kut jong ka kylla step na ka daw ka jingbym lah ban pynphai kol ka Mizoram.
Hadien katto-katne por ba la bteng ïa ka jingïakhun jong ka kylla miet, kine ki kynhun ki la ïakhun tyngeh. Kumta dei ha ka minit kaba 83 ka Services ka la ïoh ban thep biang ïa ka kol kaba ar lyngba u Bikash Thapa.
Hashwa ban sdang ka jingïakhun jong ki 90 minit, ka la mih ka jingïapyni bor hapdeng rangïalehkai ‘dien ka Services kata u Zothanpuia bad u rangïalehkai shakhmat ka Mizoram u Malsawmfela. Kane ka la pynlong ïa u Zothanpuia ban shah rei da ka red card ha u rephri, katba u Malsawmfela u la ïohpdiang da ka yellow card.
Hynrei shwa ban kut ka por ka Mizoram ka la lah ban pynphai kylla lyngba u Malsawmfela ha ka minit kaba 90+3 bad haduh kaba kut kam shym la lah shuh ban thep kol biang bad ka la mad ïa ka jingshah rem.
