Shillong, Lber 07
Ka kynhun ki ‘thei ïalehkai U-16 ka ri India ka la lah ban pynjemkhnap ïa ka Nepal haduh 10-0 kol na ka bynta ban jam sha ka final jong ka lympung ïalehkai SAFF U16 Women’s Championship kaba la long ha ka Sngi Palei ha ANFA Sports Complex kaba ha Lalitpur.
Kane ka kynhun hapoh ka jingïalam u Biby Thomas ka la ïoh ban thep kol shiteng dorjon ha ka kylla step bad ïa kiba sah pat ka la thep ha ka kylla miet. Ka ‘thei ïalehkai ‘dien ka Jylla ka Bonifilia Shullai ka la ïoh thep shi kol ha kane ka jingïakhun.
Wat la ka la shah rem ha ka Bangladesh ha ka jingïa-lehkai ba la dep, hynrei ka India sa shisien pat kan ïakynduh biang na ka bynta ban ïaknieh ïa ka nam lahduh ha ka final ka ban long ha ka Sngi U Blei.
Haba phai sha kane ka jingïakhun, ka India ka la ïoh ban pynkhih jar nyngjong lyngba ka Anita Dungdung ha ka minit kaba 2. Hadien kane ka kynhun ka la ïai bteng ban pynkhih jar lyngba ka Pearl Fernandes (14′, 43′), ka Anushka Kumari (22′), ka Bonifilia Shullai (25)’, ka Gurleen Kaur (32′, 77′), Min Maya Shrestha ka la ïarap pynthep shi kol ha ka minit kaba 46′, ka Gurnaz Kaur (58′) bad ka Rheanna Liz Jacob (79′).
Na kine ki lai sien ïakhun ka India ka la lah ban thep haduh 18 kol bad shah thep lai kol bad kiwei ki dei ki jingshah thep da 1-3 kol ha ka Bangladesh.
Ka India, kaba la wan ba-ar napdeng ki saw tylli ki kynhun, ka la ïoh 6 point na ki lai sien ïakhun. Te kumta kan ïaknieh ïa ka nam lahduh pyrshah ïa ka Bangladesh kaba la bat ïa ka kyrdan ba hakhlieh.
Ha kane ka jingïakhun u coach ka kynhun u Biby Thomas u la pynïalehkai ia ka Anita Dungdung, pynban kane ka ‘thei ïalehkai ka la lah ban pynpaw ïa ka jingtbit na ka bynta ban ïoh pynkhihjar nyngkong.
Kane ka jingshah thep kol ka Nepal ka dei na ka daw ka jingtlot palat ha ka bynta kaba shadien, ha kaba ka Anita ka la ïoh ïa ka kabu kaba biang ban shut najngai bad ka la rung hi jlang.
