Shillong, Lber 07
U Symbud Myntri Rangbah ka jylla, Bah Prestone Tynsong, u la ïoh ban leit rung ha ka ïing trep jong ka Hima Mawphlang hadien ba u la dep plie ïa ka Tamasa Mawbynna ne ka Monolith Festival kaba la sdang ha ka Sngi Palei ka 7 tarik Lber 2024 kaba don ha syndah ka ‘law kyntang jong ka Hima Mawphlang.
Napdeng ki ïing trep jong ki Hima Khasi kiba la shna kyrpang ha Khasi Heritage Village, u Bah Prestone u la ïoh rung sha ka ïing trep jong ka Hima Mawphlang bad u la shong jahthait shipor ha ka mula kaba don ïa ka dpei bad mawbyrsiew.
Ha kane ka sngi plie ïa ka tamasa pyni nam ïa ki jingbam tynrai bad jingshad tynrai ba la pynïaid da ka Khasi Hills Autonomous District Council bad ka Tnad Jngohkai Pyrthei jong ka sorkar jylla kaba la pynlong ha ka lympung kaba la shna kyrpang da ki maw bad hapdeng ka madan la siang da u phlang.
Ha kane ka sngi la ïadonlang ki MLA, MDC, ophisar, ki khlieh nongsynshar, ki rangbah shnong, ki ‘riew paidbah bad ki samla kiba wan ai jingshad bad jingrwai tynrai.
Kum ka dak ban plie ïa ka tamasa la thang ïa ka dongmusa kaba la pynïeng ha madan bad la pyllait ruh ïa ar tylli ki kot.
Kane ka tamasa kan sa kut ha ka 9 tarik u Lber 2024 ha kaba u Myntri Rangbah ka jylla un wan ban pynhap pyrda.
Hadien ba u Bah Prestone u la dep plie ïa kane ka tamasa, u la leit jngoh ïa ki basa kiba la shna ha madan ka Khasi Heritage Village, ki ïing trep jong ki hima bad ka jaka buh pynsahnam.
Haba ai jingkren ha kane ka jingïalang, u Bah Prestone u la ong ba ka sorkar ka ju ïatreilang bad ki lai tylli ki district council, bad kumta u la kyntu ïa ki district council ba kin pynkhlaiñ ïa ki aiñ ki kanun kumba la pynkupbor da ka Sorkar India.
“Ka jaidbynriew jong ngi, i kumba ka don ha tmier jong ka riat hynrei lyngba ka jingdon ka 6th schedule ngi dang sngew shngaiñ namar ngi dang lah ban bat ïa ka riti dustur bad khyndew ka shyiap” u la ong.
Kumta u la kitbok ïa kane ka monolith festival ba kan long kaba ïaid beit ïaid ryntih haduh ba kut ka lai sngi bad u la kyntu ïa ki nongïalam ka KHADC ba ki dei ban pynlong beit man u snem ïa kane ka tamasa khlem da donkam shuh ban pep wat tang shisien ruh.
Ha kane ka sngi la ïohi ba ki basa baroh ki don haduh 120 tylli kynthup ïa ki basa kiba die ïa ki mar ki bym pyut la buh hapoh ka Khasi Heritage Village, katba ïa ki mar bam baroh la buh ha madan kaba don hakhmat ka ‘law kyntang.
