Shillong, Lber 07
Ka Shillong Cricket Association (SCA) ka la sdang ïa ka lympung ïalehkai Super Division Cricket League ha ka sngi Balang ha madan ïalehkai kriket kaba ha Polo.
Ha kane ka lympung ki don haduh 12 tylli ki kynhun kiba la phiah sha ar tylli ki group. Ha ka Group-A ki long ka Sputnik CC, Sunrise CC, Nongmensong CC, Sporting CC, Royal CC bad ka United XI, katba ha ka Group-B ki long ka Rangkynsai CC, Raj Bhavan, Meghalaya Police (MLP), Langsning CC, Spartan CC bad ka NFU.
Haba phai sha ka jingïalehkai katei ka sngi sdang, ka Rangkynsai ka la pynliem noh ïa ka Raj Bhawan da 163 run. Kane ka la wan lyngba ka jingïalehkai bha u Ram Gurung bad u Ajay Duhan kiba la lah ban kynjoh palat ïa ka shispah run na ka bynta ban pynlong ïa ka Rangkynsai ban ïoh 293 run bad shah pynhap 8 wiket ha ki 45 over hadien ba la kam trai ban tied nyngkong.
U Ram Gurung u la ïoh ban khyrwit 119 run na ki 99 bol na ka bynta ban khur ïa ka nam Player of the Match bad u Ajay Duhan u la ïoh 108 run na ki 116 bol. Katba u Pankaj Mandol u la khur 5 wiket bad ïa ki 2 wiket la khur da u Arbin Singh na ka bynta ka Raj Bhawan.
Haba wan beh ïa ka thong, ka Raj Bhawan ka la ïoh tang 130 run bad shah pynhap 10 wiket ha ki 31.3 over. U Rahul Shah u la tied 32 run na ki 44 bol bad u Babloo Passah u la ïoh 23 run na ki 53 bol. Katba u Charm Marbaniang u la shim 3 wiket bad 2 wiket da u Shavian Blah.
