Shillong, Lber 07
U State President ka National People’s Party (NPP) uba dei ruh u Symbud Myntri Rangbah, Bah Prestone Tynsong, u la kyntu ïa ki samla ka National People’s Youth Front (NPYF) ban kawang nia tyngeh ïa ka Voice of People Party (VPP) kaba ju kynnoh bad kynthoh ïa ka NPP bad ïa ka Sorkar. Une u nongïalam ka NPP u la ther tyngeh da kaba ong ba ka jingpyrshah ïa ka ktien Hindi kan long shisha ka jingsepei lada jied ïa ka VPP namar ha Parliament ki kren da ka Hindi bad u kyrtong jong ka un nym shong dorbar baroh san snem, katba u la kam ba ki ar ngut ki kyrtong ka NPP, ka Kong Ampareen Lyngdoh bad ka Agatha K Sangma ki dei kiba nang ban kren Hindi tiak-tiak kum u Myntri Rangbahduh u Narendra Modi.
U Bah Prestone u la pynpaw ïa kane haba ai jingkren ha 3rd State Youth Conference jong ka National People’s Youth Front (NPYF) kaba la pynlong ha U Soso Tham Auditorium ha ka Sngi Palei.
U la ong ba ki samla ka NPYF kim dei ban tieng ïa ki jingshah kynthoh khlem nongrim khamtam lei lei ka VPP bad mynta la kham kynjah ka jingkynnoh jong kane ka seng namarba la sdang pyni nia lang.
U Bah Prestone u la ong ba ha dukan sha ne ha surok dei ban kawang beit la ki nia namar na ka VPP kiba ju kren ki don tang 3 ngut ne 4 ngut hynrei ka NPP ki don da ki hajar ngut kiba nang bad don sap ban kren bad pyni nia bad kham pnah ruh ban ïa ki namar maki ki shu hylla khlem don jingmut ei ei.
Haba khot bad wer ïa ki samla NPYF ban trei shitom na ka bynta ka seng bad ka kyrtong ha ka ilekshon Lok Sabha ka Kong Ampareen Lyngdoh bad Agatha K Sangma, u Bah Prestone u la ong ba ka NPP kan thaw ‘record’ namar baroh ngut ki MP na Shillong bad Tura ki ban phah sha Parliament ki dei ki kynthei.
U la kyntu ïa ki paidbah ka Ri-lum Khasi bad Jaiñtia ba kin nym shah pynbiej ha ka VPP namar ki shu hylla khlem don jingmut.
Haba ther ïa ka VPP halor ka jingpyrshah kren Hindi, une u State President ka NPP u la pynkynmaw ïa ka jingkren jong uwei u rangbah ba lada phah ïa u kyrtong ka VPP sha Parliament kan long tang ka jingsepei namar un phet jyndat na Parliament ba kren Hindi bad un nym shong dorbar baroh 5 snem namarba u pyrshah ban kren Hindi naba ha Parliament ki ïakren lut da ka Hindi.
“Lada phi mih jyndat, kaei pat phin kren ha Parliament, kan shu long sepei lut” u la ong haba kyntu ïa ki paidbah ka Shillong Constituency ban nym shah pynbiej.
U Bah Prestone, haba kynthoh ïa ka VPP bad ïa u President jong ka uba kynnoh ïa ka Sorkar MDA halor ka ram, u Bah Prestone u la ong ba dang shen ha Ïingdorbar Thawaiñ haba u Myntri Rangbah u ai ïa ka jubab halor ka mang tyngka jong ka Jylla hynrei ki Liang Pyrshah ki mih noh na Ïingdorbar ha ka kyrteng ki kyndon.
U la ong ba ym dei ba ong ma u hynrei ki paidbah ki la ïohi ïa ka kam ba ki la leh ha Ïingdorbar lyngba ka ‘live telecast’ kaba phalang ba ki dei ki khawpud.
U la ong ba ki dkhot ka Liang Pyrshah haba ki shong ha kamra ka Liang Pyrshah ynda la phet na Ïingdorbar, ki peit ha TV ïa ka jubab kaba ai da u Myntri Rangbah halor ka mang tyngka hynrei u President ka VPP u kynnoh ba dap ram lehse dei tang ma u uba khlem peit tuh ha TV ïa ka jingbatai bniah u Myntri Rangbah halor ka mang tyngka.
Kumta u la ong ba u President ka VPP u Bah Ardent Basaïawmoit bad kiwei ki seng lada ki kwah ki dei ban sngew laitluid ban pan jingpynshai namarba u Myntri Rangbah u long uba kloi ban batai halor ka mang tyngka.
Haba kam ba ka Sorkar MDA-2 ka dei kaba la thaw ‘record’ tang ha ki 6 snem ha ka jingmang pisa, u Bah Prestone u la ong, “Haba phai sha ka mang tyngka, ka jingbei pisa na bynta ka roi ka kiew tang hapoh ka hynriew snem, ngi la thaw record. Namarkata, kito kiba hylla ha ki jaka ïew ai ba kin hylla,” da kaba bynrap ba ki dei tang ki ksan rympei rem dorbar.
U Bah Prestone u la ong ba ka NPYF ruh ka ïeng ban shakri ïa ki paid Khasi Jaiñtia namar ki don katto-katne kiba kam ba ki ieid jaitbynriew, hynrei “ma na ruh bad ka NPYF ruh ka dei kaba ieid Jaidbynriew palat ban ïa kiwei.”
U pyntip ba ka jingïalang baheh ka NPYF kan sa long ruh ha Adogre ha Ri-lum Garo ha ka 15 tarik mynta u bnai na ka bynta jingpynkhreh ïa ka ilekshon Lok Sabha.
Namarkata, u la kyntu ïa ki nongtrei ka NPP ba kin trei shitom ban pynthikna ba baroh arngut ki kyrtong-Agatha Sangma na Tura bad Ampareen Lyngdoh na Shillong kin ïoh ïa ka jingjop bad kin long ki simpah-simsong ha Parliament.
