Jowai, Lber 07
U Chief Executive Member (CEM) ka Jaiñtia Hills Autonomous District Council (JHADC), Bah Thombor Shiwat ha ka Sngi Palei u la wanrah ïa ka mang tyngka jong ka council na ka bynta u snem 2024-2025 kaba duna pisa.
Kane ka jingwanrah ïa ka mang pisa kaba duna ka la long mynta la hynriew snem kynthih. Ka daw halor kane ka dei na ka jingkhang tih dewïong kaba la ktah ïa ka pla tyngka jong ka Council.
Kum ban shu pynkynmaw, ka Executive Committee hapoh ka jingïalam u Bah Thombor Shiwat ka la wanrah ïa ka mang tyngka kaba duna ne ka deficit budget ha u snem 2019, 2020, 2021, 2022 bad 2023 bad na ka daw ba la pynjlan ïa ka por treikam jong ki MDC sa hynriew bnai, kumta u Bah Shiwat u la ïoh lad ban wanrah biang ïa ka mang tyngka kaba hynriew bad kata ruh kaba duna pisa.
Haba wanrah ïa ka mang tyngka na bynta 2024-25 hapoh ka Dorbar Mang Tyngka, u CEM u la ïathuh ba ka jingïoh pisa kaba shu antad ne estimated receipt ka long `204,63,23,500 na ka jingpynlut pisa kaba shu antad ne ka estimated expenditure ka `218,22,60,300 bad kumta ka jingmang tyngka ka long kaba duna pisa haduh `13,59,36,800. U la ïathuh ba ka jingïoh lum khajna na ki jingdon jingem jong ka Council ka long `29,38,23,800 bad na ka bhah lyngba ka khajna ka Sorkar ka long `97,50,00,000 bad ki jingïarap pisa lyngba ka Sorkar `77,74,99,700.
U CEM u la ong ba baroh ka jingïoh lum khajna jong ka Council ha u snem mang tyngka 2022-2023 ka long `113,62,46,064, kata na baroh ka jingpynlut kaba kot sha ka `117,81,88,185. Ïa ka jingduna kaba `4,19,42,121 la lah ban khyllie na kaba tam ha ki snem kiba la dep.
Halor ki bhah na ki khajna ba la ïohpdiang na ka Sorkar Jylla ha u snem 2023-2024, u CEM u la ong ba ka Executive Committee lyngba ka jingbteng borbah ka la ïoh lum khajna haduh `46,63,70,500 na ki mar poh khyndew kiba kongsan bad `13,96,86,519 na ki mar poh khyndew barit baria, katba ki khajna lyngba ki kali ka long da `14,50,93,319 ïa kiba la ïoh lum kat haduh mynta.
“Ka jingbhah ïa ka khajna ba la pyllait da ka Sorkar Jylla lem bad kiwei pat ki khajna ba la ïohpdiang da ka Council la pyndonkam ha kaba siew ïa ki tulop ba dang sahteng jong ki dkhot, ki nongtrei bad ki nongïoh baibam tymmen jong ka Council, kata nalor ka jingpynphai ïa ka ram ba shipor ba la shim na ki tnat treikam jong ka sorkar nalor kiwei pat ki jingpynlut jong ka ophis,” la ong u CEM.
Ha kaba ïadei bad ka jingïoh pdiang ïa ki jingïarap pisa na ka sorkar, lah ban kdew ha kane ka snem Mang Tyngka 2023-24, `17,00,000 la ïoh pdiang lyngba ka Land Reform Scheme, katba ki skhim ba la bei da ka Sorkar pdeng ka Council la khmih lynti ba kan ïoh pdiang `3,54,04,700 kum ka 1st Installment na ka Digital India Land Record Modernisation Programme (DILRMP),” u la bynrap.
Ban shim ïa ki sienjem halor kane ka jingduna, u CEM u la ong ba ka Executive Committee ka la shim ïa ki sienjam ban pynïar ïa ka jingïoh lum khajna na ka bynta jong ka Council. Kane kan kynthup halor ka jingwanrah ïa ka Jaintia Hills Autonomous District Council (Village and Town Development Council) Bill, 2023. Ïa kane ka Bill la wanrah hapoh ka ïingdorbar ha ka Dorbar Tlang kaba la long ha ka 9 tarik u Naiwieng 2023, bad ïa kane ka juh la phah sha u Lat ka Jylla na ka bynta ban ïoh ïa ka jingmynjur.
Nalor kata, ka Council ka la shim ruh ïa ka rai ban thaw ïa ka Village and Town Administration Department ka ban khmih halor ka jingpyntreikam ïa ka Building Bye Law ka ban ïarap ban kyntiew bad pynneh ïa ka pla tyngka jong ka Council lyngba ka jingai jingbit na ka bynta ki kam tei ïing tei sem bad ki bynta kiba don jingïadei bad kane.
U CEM u pyntip ruh ba lyngba ka tnat Art & Culture yn pynmih ïa ka jingpynbna paidbah khnang ba ki jaka jngohkai kiba la don lypa bad ki kynhun kiba ïadon bynta, ki jaka treikam shimet, ki briew kiba thmu ban plie ïa ki jaka jngohkai bathymmai ki dei ban ïoh ïa ka jingai jingbit, ka No Objection Certificate na ka District Council. Shuh shuh u la ong ban pynduna ïa ka jingpynlut ka council ba ha une u snem yn pynduna ruh ïa ki nongtrei ka council sha ka 1286 na ka 1335 bad kiwei kiwei ki jingpynlut la pynduna.
