Shillong, Lber 08
Ha ka 7 tarik u Lber, u Block Development Officer (BDO), Dambo Rongjeng C&RD Block (EGH) u la ujor ejahar ba ha ka 10 tarik Risaw, 2023, ki nongbat ‘Job Card’ ka Rongchong VEC hapoh Rongjeng C&RD Block ki la ujor pyrshah ïa u Rojitdro Momin kum President bad Mohat Marak kum Secretary halor ka jingkynnoh ba kim shym la siew ïa ka bainong haba ïadei bad ki jingshna ïa ka ‘CC footpath’, kynroh ïada bad nala heh ba la tap sleb.
Ha ka jingtohkit na ka liang ka shlem treikam Block, la shem ba ka VEC ka la dep sei T. 16,33,470/- bad kynnoh ba la siew T. 2,18,900/- kum ka bainong sha kito kiba don ‘Job Card’, bad kynnoh ruh ba ka don ka jingpyndonkam ïa ka pisa T 14, 14,570/-.
Hadien kane, ki nongtrei VEC ki la ïoh por haduh ka 29 tarik Rymphang, 2024, ban pynbeit ïa ki jingsiew, hynrei kim shym la lah ban siew dep ïa kaba sah bad kim shym la ïatreilang.
Kumjuh ha ka 7 tarik mynta u bnai, ki pulit ki la ïoh jingtip ba ha ka por 6.00 mynstep, kawei ka briew kaba kyrteng ka Dara Banu (31 snem ka rta), la lap ba ka la thiah ïap ha ïingsah lade ha ka shnong Shyamding kaba hap hapoh Phulbari PS (WGH). Kumta la pyndep ïa ka jingdonkam bad ïa ka met la pynkynriah noh sha CH Tura na bynta ka ‘Post Mortem’.
