New Delhi, Lber 08
Uwei u shipai, uba la shah rahbor na la ïing sah kaba don ha Manipur ha ka step Sngi Thohdieng, u la shah pyllait im ha ki shipai ha ka por janmiet hadien kumba 10 kynta, la ong ka tnat shipai ha u kyrwoh khubor.
Utei u shipai uba la shah rahbor u dei u Junior Commissioned Officer (JCO) Naib Subedar Konsam Kheda Singh, uba shong ba sah ha Charang-pat Mamang Leikai ha Thoubal District. Ha ka por ba u la shah rahbor, une u shipai u don hapdeng ka shuti. La ong ba u la shah rahbor ha ki briew ki bym lah ban ithuh na ka ïing jong u ha ka por kumba 9 baje mynstep. La ong ruh ba la rahbor ïa u ha kawei ka kali.
“Ki shipai ki la pynlong ïa ka jingkhynra ryngkat bad kiwei pat ki bor pahara ban ïoh pyllait ïa u JCO,” la ong ka tnat shipai ha u kyrwoh khubor.
“Ka jingïatreilang ka la pynlong ïa ki bor pahara ban ïoh pyllait im ïa u JCO ha ka por kumba 6:30 janmiet mynta ka sngi. Ïa mynta, u JCO u don ha thanat Waikhong (hajan Kakching) ha Thoubal District. Ki pulit ka Manipur ki dang tohkit halor katei ka jingjia,” la bynrap ka tnat shipai.
Ka jingshah rahbor jong utei u shipai ka dei ka jingjia kaba saw naduh ba ka jingïakynad bad jingïaumsnam ka la sdang ha Manipur ha u Jymmang 2023.
Ha u Nailur 2023, uwei u shipai ba la shongthait jong ka Assam Regiment, u Serto Thangthang Kom, u la shah rahbor bad shah pynïap ha ka kynhun ki ‘riewkieng atiar. Ha ka por ba la u shah pynïap, u Kom u don bad ka Defence Service Corps (DSC) ha Leimakhong.
Ar bnai hadien, ki kynhun ‘riewkieng atiar ki la rahbor ïa saw ngut ki briew kiba dang shong da ka kali na Churachandpur sha Leimakhong, bad ki la pynïap ïa ki. Kine ki saw ngut ki dei na ka ïing ka sem jong uwei u shipai uba trei ha Jammu & Kashmir.
Sa ha kawei pat ka jingjia, uwei u Additional Superintendent of Police (ASP) u la shah rahbor kumba katto-katne por ha Imphal ha ka 27 tarik Rymphang. Kiba la rahbor ïa u ki dei kiba la tip kum ki Arambai Tenggol. Hadien kane ka jingjia, ki pulit ‘Commando’ ka Manipur ki la pyndem ïa ka ki suloi bad tiar siat kum ka dak jong ka jingpynrem.
