Shillong, Lber 08
Ka Shillong Lajong FC kan pynkhreh ban ïakhun pyrshah ïa ka Aizawl FC ha ka lympung ïalehkai I-League ka ban long mynta ka Sngi Saitjaiñ ha ka por 4:30 janmiet ha RG Stadium, Aizawl kaba ha Mizoram.
Kane ka kynhun ïalehkai na nongbah hapoh ka jingïalam u Bah Bobby L. Nongbet ka donkam ban ïoh jingjop namar ha ka jingïalehkai ba la dep kaba long ha Goa ka la shah rem ha ka Churchill Brothers da 2-1 kol.
Kumta ka Lajong ka la ïai sah ha ka kyrdan hynriew bad ïoh 26 point na ki 17 sien ïakhun ha kaba ka la jop 7 sien, ïakhaid 5 sien bad shah rem 5 sien.
Hashwa kane ka jingïakhun ka ban long ha Aizawl, u Bah Bobby L. Nongbet u la pynpaw ïa ka jingkhmih lynti ba ka kynhun ïalehkai bha hadien ba ka la shah rem ha ka jingïalehkai ba la dep.
“Ngi khmih lynti ba ka kynhun kan ïakhun tyngeh na ka bynta ban khur ïa ki lai point khnang ban jam sha ki kyrdan ba kham shakhmat,” u la bynrap.
Ha kawei pat ka liang ka Aizawl FC (21 point) ka la don ha ka kyrdan ba khyndai hadien ba ka la jop 5 sien, ïakhaid 6 sien bad shah rem 5 sien na ki 16 sien ïakhun.
Namar kata, kine baroh ar kynhun ki la khmih lynti ban ïoh ïa ka jingjop ha kane ka jingïakhun.
Ha ka wat kaba nyngkong kaba la long ha ka nongbah, ka Lajong ka la shah rem da 3-0 kol ha ka Aizawl.
