Shillong, Lber 08
Namar ba ka Election Commission of India (ECI) kan sa pynbna noh shen ïa ka ilekshon sha ka Ïingdorbar Lok Sabha, ka Sorkar Jylla ka la khih khohreh bad bunkam ban pynbit pynbiang ïa ki jingdonkam na ka bynta ban buh mawnongrim ïa ki projek bapher bapher khnang ban ïoh sdang pyntrei noh ha shwa ban pynbna ïa ka ilekshon.
Naduh kine khyndiat taïew ba la dep, la sakhi ïa ki jingïalang buh mawnongrim kiba pynlong da ka Sorkar ha kylleng ka Jylla ban pyntrei ïa ki projek bapher bapher.
U Myntri Rangbah bad ki Myntri Sorkar ki la leit ban buh mawnongrim ha kylleng ki jaka ha kine ki khyndiat taïew bad ki don ruh ki projek kiba la dep ha kaba ka Sorkar ka la khap ribon kum ka jingplie noh.
Ki don ki sngi ba u Myntri Rangbah u la leit ban buh mawnongrim 2 tylli ne 3 tylli ha ka shisngi nalor ki projek kiba la dep tei bad plie noh.
Kane ka jingkyrkieh ka Sorkar Jylla bad kumjuh ruh ka Sorkar Pdeng ban pynïaid shaid-shaid ïa ki kam ka dei namar ba ka por ka sah sa tang khyndiat sngi ha shwa ba ka ECI kan pynbna ïa ka ilekshon MP, 2024.
Tang mar ïa pynbna ïa ka ilekshon, ka Sorkar Pdeng ne Sorkar Jylla kim lah shuh ban pynbna ban pyntrei ïa ki projek ne shim kino-kino ki rai kiba thymmai namar ba la treikam ki kyndon kiba pyrkhing ilekshon lane model code of conduct.
Kumta la sakhi ba ha ka Sngi Thohdieng, u Myntri Rangbah u la leit buh mawnongrim kumba 3 tylli ki projek ha ryngkat ki Myntri Sorkar kiba peit ïa ki tnat treikam bapher bapher.
La sakhi ruh ïa ki projek kiba la khap ribon ha kylleng kiba jaka kum ka dak ka jingplie noh ban ïoh pyndonkam ïa ki ïing.
Kine ki projek bapher bapher ki dei ruh kiba kot da ki hajar klur.
Ha kane ka taïew ban wan ruh la khmih lynti ba ka Sorkar kan buh mawnongrim biang na ka bynta ki projek kiba dang sahteng.
