Ka jingïaid ïew u prah ha ka por ilekshon ka la aikam ïa ngi, ong ki longkmie na Kenmynsaw

Shillong, Lber 08

Ki ar ngut ki longkmie na ka shnong Kenmynsaw kaba hap ha thaiñ Synteiñ, Mawsynram Block, East Khasi Hills ki la pynpaw ba ka jingïaid ïew u prah kaba dei ka shap jong ka seng Voice of the People Party (VPP) ha ka por ilekshon MLA mynshem snem ka la aikam ïa ki nongthaiñ prah namar ki la hap ban pynbun ki nongbylla khnang ban lah shalan ïa u prah sha Shillong bad Mawngap.

Kine ar ngut ki longkmie ki dei ba la tip kyrteng kum ka Bibnet Langpen bad ka Dmit Pdahkasiej na Ken-mynsaw. Kine ki la wan die ïa ki jingthaiñ da ka kti kiba pyndonkam da u siej kum u prah, kriah, ki shang, ki tupia bad kiwei kiba la shong die hakhmat ka ïing trep jong ka Hima Mawsynram.

Ha ka jingïakren kyrpang bad U Nongsaiñ Hima ha ka sngi ba ar jong katei ka tamasa, kine ki longkmie ki la ïathuh ba mynta haba ka ilekshon MP Lok Sabha bad MDC ka la jan ki la hap ban pynbun ki nongbylla ban pynmih shibun u prah.

Ki la pynpaw da kaba pynmih shibun u prah ka la aikam ïa ki nongbylla ki nongdie bad ïa kiba pyndonkam ïa u prah ruh.

Nangta, ki la ïathuh ruh ba ka shnong Kenbah ka dei kaba khlaiñ bha ban thaiñ prah bad knup, ka Kenmynsaw ki khlaiñ ban thaiñ khoh bad knup, ka Mawkaphan ki khlaiñ ban thaiñ Polo, ka Domskong bad Jympiat ki khlaiñ ban thaiñ knup.

Shuh shuh ki la ïathuh ba ki khoh u star ki ïaid ïew bha ha ri Khasi ha ki jaka ba khlaiñ ban rep.

Ha kawei pat ka khubor, kane ka tamasa pyni nam ïa ki tiar, ki jingbam, shad bad rwai tynrai jong ka jaidbynriew Khasi kaba la tip kum ka Monolith Festival kaba don hajan ka law kyntang kaba don ha Mawphlang ka la sdang ban shongshit namar ki paidbah ki la sdang ban wan tuid ha ka sngi ba ar kaba dei artad ka Sngi Thohdieng.

Ha kane ka sngi ba ar ka rynsan kaba don ha lympung ka jingrwai bad shad tynrai ka ïaid beit naduh ka por 11:00 baje mynstep haduh 9 baje janmiet, katba ki dukan bam, ki dukan die ïa ki tiar tynrai ruh ki ïaid baroh shi sngi ha kaba ki paidbah kiba wan sha kane ka tamasa ki sngewtynnad namar ki ïoh ban pynlut ïa ka por baroh shisngi.

Ïa kane ka tamasa la plie da u Symbud Myntri Rangbah ka jylla, Bah Preston Tynsong ha ka 7 tarik Lber bad yn pynkut ha ka Sngi Saitjaiñ ka 9 tarik Lber da u Myntri Rangbah ka jylla, u Conrad K Sangma.

Haba ïoh ban ïakren bad u Bah Kit Shangpliang uba dei u nongrwai jong ka ‘Summersalt’, u la pynpaw ka jingsngewkmen haba u la ïoh ban rwai biang ha kane ka tamasa namar kane ka tamasa ka pynkynmaw ïa ki por mynshwa, ïa ka mynta bad ka lashai.

Katba u Bah Alan West Kharkongor uba peit ïa kane ka tamasa, u la pynpaw ka jingsngewkmen haba ki paidbah ki la wan sha kane ka jaka ban tip ïa ka tynrai u Khasi kaba la pyni ha kane ka tamasa.

U la ïathuh haba ki longkmie ki wan da ka riam tynrai ha kane ka Monolith Festival ka pynkynmaw ïa ki longshwa.